
22
Jul, 2016
ការចុះបណ្ដុះបណ្ដាលមន្ត្រី និងថែទាំសម្ភារបច្ចេកទេសប្រព័ន្ធ FMIS ជុំទីពីរ
ចាប់ពីថ្ងៃទី០៨ ខែឧសភា ដល់ថ្ងៃទី១២ ខែកក្កដា ឆ្នាំ២០១៦ កន្លងទៅនេះ ក្រុមការងារគ្រប់គ្រងគម្រោង FMIS របស់នាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងសេដ្ឋកិច្ច និងហិរញ្ញវត្ថុ បានបន្តចុះទៅបណ្ដុះបណ្ដាលមន្ត្រីអំពីរបៀបប្រើប្រាស់ប្រព័ន្ធ ឆ្លើយតបនឹងតម្រូវការជាក់ស្ដែង និងការស្នើសុំរបស់មន្ត្រីប្រើប្រាស់ប្រាស់ប្រព័ន្ធនៅតាមរតនាគាររាជធានី-ខេត្ត ។
គោលបំណងនៃការចុះបណ្ដុះបណ្ដាលបន្ថែមលើកនេះគឺផ្ដោតសំខាន់លើ ចំណេះដឹងស្ដីអំពីការប្រើប្រាស់មុខងារក្នុងប្រព័ន្ធ និងការបង្ហាញពីរបៀបប្រើប្រាស់ប្រព័ន្ធ Help Desk ក្នុងការជួយដោះស្រាយបញ្ហាពីចម្ងាយដោយការប្រើប្រាស់ប្រព័ន្ធ (Remote Assistance) និងការចុះត្រួតពិនិត្យ ថែទាំម៉ាស៊ីនកុំព្យូទ័រ ម៉ាស៊ីនថតចំឡង ម៉ាស៊ីន Scan និងឧបករណ៍សម្ភារបច្ចេកវិទ្យានានាទាក់ទងនឹងប្រព័ន្ធ FMIS។
ក្នុងបេសកកម្មនេះ ក្រុមការងារបានបែងចែកជាពីរក្រុមធំៗ ចុះទៅតាមគ្រប់រតនាគាររាជធានី-ខេត្ត ដែលក្នុងរតនាគារមួយត្រូវចំណាយរយៈពេលពីរថ្ងៃពេញ។ បេសកកម្មទាំងមូលត្រូវចំណាយពេលសរុប ប្រហែលពីរខែពេញ ដោយចាប់ផ្ដើមពីថ្ងៃទី០៨ ខែឧសភា ដល់ថ្ងៃទី១២ ខែកក្កដា។
ជាលទ្ធផល ក្រុមការងារបានដោះស្រាយ និងពន្យល់ណែនាំអំពីភាពងឿងឆ្ងល់ និងបញ្ហានានាដែលលើកឡើងដោយមន្ត្រីប្រើប្រាស់ប្រព័ន្ធផ្ទាល់។ ក្រុមការងារសង្កេតឃើញថា មន្ត្រីនៅរតនាគារបានបង្ហាញពីការចាប់អារម្មណ៍យ៉ាងខ្លាំង ក្នុងការត្រងត្រាប់ចាប់យកចំណេះដឹងបន្ថែមពីការចុះបណ្ដុះបណ្ដាលលើកនេះ។ ទោះជាយ៉ាងនេះក្ដី ក្រុមការងារក៏បានស្វែងរកឃើញចំណុចគន្លឹះរួមមួយចំនួន ដែលភាគីពាក់ព័ន្ធចាំបាច់ត្រូវពិចារណាស្វែងរកដំណោះស្រាយរួម៖
- រតនាគារមួយចំនួននៅតែកត់ត្រាក្នុងប្រព័ន្ធចាស់របស់ខ្លួន ដែលធ្វើឱ្យបន្ទុកការងារកើនឡើង ហើយត្រូវចំណាយពេលយូរក្នុងការរៀបចំបញ្ជីវិភាគដោយដៃសម្រាប់អគ្គនាយកដ្ឋានរតនាគារជាតិជារៀងរាល់ខែ
- មន្ត្រីមួយចំនួនមិនអាចចូលរួមពេញលេញក្នុងការបណ្ដុះបណ្ដាលការប្រើប្រាស់ប្រព័ន្ធ ដោយសារមូលហេតុជាប់រវល់ជាមួយការងារដោយដៃរបស់គាត់
- ភាពខុសគ្នាមួយចំនួននៃលេខគណនីក្នុងប្រព័ន្ធ FMIS និងលេខគណនីបច្ចុប្បន្ន ដែលកំពុងប្រើប្រាស់ក្នុងរតនាគារ ធ្វើឱ្យរបាយការណ៍ ឬឯកសារផ្សេងៗ ដែលបោះពុម្ពពីប្រព័ន្ធមិនអាចប្រើប្រាស់បាន
- ចរន្តអគ្គិសនីនៅខេត្តខ្លះមិនទាន់មានស្ថេរភាពគ្រប់គ្រាន់ ឬមានការដាច់ញឹកញាប់ ដែលអាចបង្កឱ្យឧបករណ៍អេឡិចត្រូនិចប្រើប្រាស់ផ្គត់ផ្គង់ប្រព័ន្ធឆាប់ខូច
- សមត្ថភាពមន្ត្រីមួយចំនួននៅមានកម្រិត ដែលធ្វើឱ្យការចុះប្រតិបត្តិការក្នុងប្រព័ន្ធមានសភាពយឺតយ៉ាវ និងមិនអាច ស្វែងរក ឬដោះស្រាយបញ្ហា Error ពេលចុះប្រតិបត្តិការភ្លាមៗបាន។
ជាទូទៅ ក្រុមការងារគ្រប់គ្រងគម្រោងក៏បានបង្ហាញពីសុទិដ្ឋិនិយមទៅលើការចុះបណ្ដុះបណ្ដាលលើកនេះ ហើយសង្ឃឹមយ៉ាងមុតមាំថា ចំណេះដឹង ក៏ដូចជាការផ្ដល់ការថែទាំសម្ភារទាំងអស់នេះ នឹងជួយដល់មន្ត្រីដើម្បីពន្លឿនការអនុវត្តការងារដោយប្រើប្រាស់ប្រព័ន្ធ FMIS ផ្ទាល់។ ហើយបទពិសោធន៍លើកនេះ ក៏នឹងក្លាយជាធាតុចូលដ៏សំខាន់សម្រាប់ក្រុមការងារយកទៅគិតគូរពិចារណា ធ្វើយ៉ាងណាធ្វើឱ្យមានភាពប្រសើរឡើងក្នុងការប្រើប្រាស់ប្រព័ន្ធទៅថ្ងៃអនាគត។
ខាងក្រោមនេះគឺជាកាលវិភាគ ដែលក្រុមការងារបានចុះទៅផ្ទាល់នៅតាមរតនាគាររាជធានី-ខេត្តទាំង២៥ ក្នុងជុំទីពីរ (សូមចុចលើខេត្តនីមួយៗដើម្បីចូលទៅកម្រងរូបភាពរបស់ខេត្តនីមួយៗ)៖
- ថ្ងៃទី ០៩-១០ ខែឧសភា រតនាគារខេត្តប៉ៃលិន
- ថ្ងៃទី ០៩-១០ ខែឧសភា រតនាគារខេត្តមណ្ឌលគីរី
- ថ្ងៃទី ១២-១៣ ខែឧសភា រតនាគារខេត្តបាត់ដំបង
- ថ្ងៃទី ១២-១៣ ខែឧសភា រតនាគារខេត្តស្ទឹងត្រែង
- ថ្ងៃទី ១៦-១៧ ខែឧសភា រតនាគារខេត្តកោះកុង
- ថ្ងៃទី ១៦-១៧ ខែឧសភា រតនាគារខេត្តស្វាយរៀង
- ថ្ងៃទី ១៩-២០ ខែឧសភា រតនាគារខេត្តព្រៃវែង
- ថ្ងៃទី ១៩-២០ ខែឧសភា រតនាគារខេត្តព្រះសីហនុ
- ថ្ងៃទី ២៣-២៤ ខែឧសភា រតនាគារខេត្តកំពត
- ថ្ងៃទី ២៦-២៧ ខែឧសភា រតនាគារខេត្តតាកែវ
- ថ្ងៃទី ៣០-៣១ ខែឧសភា រតនាគារខេត្តឧត្ដរមានជ័យ
- ថ្ងៃទី ០២-០៣ ខែមិថុនា រតនាគារខេត្តបន្ទាយមានជ័យ
- ថ្ងៃទី ០៦-០៧ ខែមិថុនា រតនាគារខេត្តពោធិ៍សាត់
- ថ្ងៃទី ០៩-១០ ខែមិថុនា រតនាគារខេត្តកំពង់ឆ្នាំង
- ថ្ងៃទី ១៣-១៤ ខែមិថុនា រតនាគារខេត្តព្រះវិហារ
- ថ្ងៃទី ១៦-១៧ ខែមិថុនា រតនាគារខេត្តសៀមរាប
- ថ្ងៃទី ២០-២១ ខែមិថុនា រតនាគារខេត្តក្រចេះ
- ថ្ងៃទី ២៣-២៤ ខែមិថុនា រតនាគារខេត្តត្បូងឃ្មុំ
- ថ្ងៃទី ២៧-២៨ ខែមិថុនា រតនាគារខេត្តរតនគីរី
- ថ្ងៃទី ៣០-០១ ខែមិថុនា រតនាគារខេត្តកំពង់ធំ
- ថ្ងៃទី ០៤-០៥ ខែកក្កដា រតនាគារខេត្តកំពង់ចាម
- ថ្ងៃទី ០៤-០៥ ខែកក្កដា រតនាគារខេត្តកែប
- ថ្ងៃទី ០៧-០៨ ខែកក្កដា រតនាគារខេត្តកណ្ដាល
- ថ្ងៃទី ០៧-០៨ ខែកក្កដា រតនាគារខេត្តកំពង់ស្ពឺ
- ថ្ងៃទី ១១-១២ ខែកក្កដា រតនាគាររាជធានីភ្នំពេញ។
ជាចុងក្រោយ ក្រុមការងារគ្រប់គ្រងគម្រោង FMIS សូមថ្លែងអំណរគុណចំពោះមន្ត្រីរតនាគារទាំងអស់ដែលបានចូលរួមសហការយ៉ាងសកម្មក្នុងកំឡុងពេលបំពេញការងារ។
ប្រសិនបើអ្នកមានជាសំណួរ ឬមតិយោបល់ផ្សេងៗ សូមទាក់ទងមកក្រុមការងារគ្រប់គ្រងគម្រោងដោយផ្ទាល់តាមរយៈលេខទូរស័ព្ទ 023 430 063 ឬអាសយដ្ឋានអ៊ីម៉ែល fmis.info@mef.gov.kh។