8
Sep, 2016
អគ្គនាយកដ្ឋានរតនាគារជាតិ៖ ទិន្នន័យក្នុងប្រព័ន្ធ FMIS ត្រូវតែមាន
ឯកឧត្ដម វង្ស ប៊ុនឥន្ទ្រាវុធ អគ្គនាយក នៃអគ្គនាយកដ្ឋានរតនាគារជាតិ និងជាអនុប្រធានក្រុមការងារគ្រប់គ្រងគម្រោង FMIS បានបញ្ជាក់ថា រាល់ទិន្នន័យហិរញ្ញវត្ថុទាំងអស់ត្រូវកត់ត្រាឱ្យបានខ្ជាប់ខ្ជួននៅក្នុងប្រព័ន្ធ FMIS ដើម្បីអាចទាញយករបាយការណ៍មកផ្ទៀងផ្ទាត់ជាមួយកម្មវិធីចាស់។
ឯកឧត្ដមបានថ្លែងយ៉ាងដូច្នេះក្នុងកិច្ចប្រជុំពិភាក្សាអំពីវឌ្ឍនភាពការងារ និងបញ្ហាប្រឈម ដែលអគ្គនាយកដ្ឋានរតនាគារជាតិបានជួបប្រទះ រវាងអគ្គនាយកដ្ឋាន ជាមួយនឹងនាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងសេដ្ឋកិច្ច និងហិរញ្ញវត្ថុ នៅព្រឹកថ្ងៃទី០៨ ខែកញ្ញានេះ នៅសាលប្រជុំរបស់នាយកដ្ឋានរតនាគារជាតិ។
ឯកឧត្ដមក៏ជំរុញឱ្យមានការកត់ត្រាបានឆាប់រហ័សក្នុងប្រព័ន្ធ FMIS ដោយហេតុថា របាយការណ៍ចេញពីប្រព័ន្ធនេះ នឹងត្រូវយកទៅប្រៀបធៀប ធ្វើយ៉ាងណាឱ្យមានតួរលេខដូចគ្នាទៅនឹងរបាយការណ៍ចេញពីប្រព័ន្ធចាស់ ដែលរតនាគារធ្លាប់អនុវត្តកន្លងមក មុននឹងផ្លាស់ប្ដូរមកប្រើប្រាស់ប្រព័ន្ធ FMIS ទាំងស្រុង នៅថ្ងៃអនាគត។
លើសពីនេះទៅទៀត ក្នុងកិច្ចពិភាក្សាលើកនេះ ឯកឧត្ដម និងក្រុមការងារបានលើកឡើងអំពីបញ្ហាប្រឈមនានា ដែលអគ្គនាយកដ្ឋានរតនាគារជាតិ ព្រមទាំងរតនាគារជាតិរាជធានី-ខេត្តបានជួបប្រទះ ហើយបានពិភាក្សា ក៏ដូចជាស្នើ៎ឱ្យក្រុមការងារបច្ចេកទេសរបស់នាយកដ្ឋានព័ត៌មានវិទ្យាជួយដោះស្រាយឱ្យទាន់សភាពការ និងតម្រូវការរបស់មន្ត្រីប្រើប្រាស់ប្រព័ន្ធ។
ជាលទ្ធផល ក្រុមការងារបច្ចេកទេសរបស់នាយកដ្ឋានព័ត៌មានវិទ្យា បានសន្យាបន្តសហការជាមួយអ្នកពាក់ព័ន្ធនានា ក្នុងការដោះស្រាយបញ្ហាដែលលើកឡើងទាំងអស់នេះ ក្នុងន័យជំរុញដំណើរការអនុវត្តគម្រោងប្រព័ន្ធ FMIS ប្រកបដោយប្រសិទ្ធភាព សម្ដៅគាំទ្រកម្មវិធីកែទម្រង់ហិរញ្ញវត្ថុសាធារណៈរបស់រាជរដ្ឋាភិបាលកម្ពុជា៕
