14
Sep, 2016
ប្រធានរតនាគាររាជធានី-ខេត្ត មានសុទិដ្ឋិនិយមលើប្រព័ន្ធ FMIS
ប្រធានរតនាគាររាជធានី-ខេត្ត មានការតាំងចិត្តខ្ពស់ក្នុងការអនុវត្តប្រព័ន្ធ FMIS នៅរតនាគារឱ្យកាន់តែមានប្រសិទ្ធភាព បន្ទាប់ពីបានធ្វើដំណើរទស្សនកិច្ចសិក្សាស្វែងយល់ពីការអនុវត្ត ប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ ដែលមានឈ្មោះថា SPAN នៅទីក្រុងចាកាតា ប្រទេសឥណ្ឌូនេស៊ី កាលពីចុងខែកក្កដា ឆ្នាំ២០១៦។
លោក សេង ម៉ៅ ប្រធានរតនាគារខេត្តស្ទឹងត្រែង ដែលបានចូលធ្វើដំណើរទស្សនកិច្ចសិក្សាទៅប្រទេសឥណ្ឌូនេស៊ី មានប្រសាសន៍ថា ការអនុវត្តប្រព័ន្ធ SPAN របស់ឥណ្ឌូនេស៊ី មិនសូវមានបញ្ហាប្រឈមគួរឱ្យកត់សម្គាល់ខ្លាំងនោះទេ ដោយសារប្រទេសឥណ្ឌូនេស៊ីប្រើប្រាស់ពេលវេលាច្រើនឆ្នាំ ក្នុងការសិក្សាកត្តាពាក់ព័ន្ធទាំងអស់មុននឹងដាក់ឱ្យអនុវត្តជាផ្លូវការ ដោយឡែកប្រព័ន្ធ FMIS របស់ប្រទេសកម្ពុជា គឺត្រូវដាក់ឱ្យអនុវត្ត ក្នុងលក្ខខណ្ឌសិក្សារៀនសូត្របណ្តើរ អនុវត្តបណ្តើរ ដែលជាហេតុនាំឱ្យមានបញ្ហាប្រឈមច្រើន។
លោកបន្ថែមថា បើទោះជាប្រព័ន្ធ FMIS ជាប្រព័ន្ធថ្មីដែលធ្វើឱ្យមន្រ្តីរតនាគារមានការលំបាកខ្លះៗក្នុងការប្រើប្រាស់ក្តី ទាំងថ្នាក់ដឹកនាំ និងមន្រ្តីរតនាគារទាំងអស់កំពុងប្រឹងប្រែងសិក្សាបន្ថែម និងបញ្ចូលប្រតិបត្តិការទៅក្នុងប្រព័ន្ធឱ្យបានទាន់ពេលវេលា និងមានប្រសិទ្ធភាព។ ក្នុងនោះលោកក៏បានជំរុញលើកទឹកចិត្តដល់មន្រ្តីក្នុងការប្រើប្រាស់ប្រព័ន្ធ តាមរយៈការចូលរួមដោះស្រាយបញ្ហាប្រឈមឱ្យបានទាន់ពេលវេលា ផ្តល់ជាថវិកាឧបត្ថម្ភ និងកម្លាំងចិត្តជាដើម។
លោក តូច គន្ធា ប្រធានរតនាគារខេត្តឧត្តរមានជ័យ ដែលបានចូលរួមដំណើរទស្សនកិច្ចសិក្សាទៅប្រទេសឥណ្ឌូនេស៊ីផងដែរនោះ មានប្រសាសន៍ឱ្យដឹងថា ការប្រើប្រាស់ប្រព័ន្ធ SPAN ក្នុងការកត់ត្រាប្រតិបត្តិការហិរញ្ញវត្ថុគឺមានសុក្រិតភាពខ្ពស់ ដោះស្រាយបញ្ហាបានទាន់ពេលវេលា ដោយសារប្រព័ន្ធមានបច្ចេកវិទ្យាខ្ពស់ និងមានភាពទំនើប។
លោកបានបញ្ជាក់ថា នៅពេលដែលប្រព័ន្ធ FMIS ដំណើរការបានរលូន វាអាចជួយកាត់បន្ថយពេលវេលារបស់មន្រ្តីក្នុងការចុះប្រតិបត្តិការ កាត់បន្ថយការប្រើប្រាស់ឯកសារជាក្រដាសបានច្រើន និងអាចផលិតរបាយការណ៍ហិរញ្ញវត្ថុបានច្រើនប្រភេទ ព្រមទាំងមានសុក្រិតភាពខ្ពស់។ លោកប្រាប់ថា មកដល់ពេលបច្ចុប្បន្ន ការចុះប្រតិបត្តិការ និងទាញយករបាយការណ៍របស់រតនាគារខេត្ត មានភាពល្អប្រសើរពីមួយថ្ងៃទៅមួយថ្ងៃ ហើយការបញ្ចូលអាណត្តិក្នុងប្រព័ន្ធបាន៩៥% ហើយមន្រ្តីរតនាគារកំពុងខិតខំព្យាយាមបញ្ចូលឱ្យបាន១០០% នាពេលអនាគត។
ស្របពេលជាមួយគ្នានេះដែរ លោក កែ ប៊ុនឡេង ប្រធានរតនាគាររាជធានីភ្នំពេញ ដែលបានចូលរួមក្នុងដំណើរទស្សនកិច្ចសិក្សាផងដែរនោះ ក៏បានប្រាប់ដូចគ្នាថា ឧបករណ៍សម្រាប់គាំទ្រប្រព័ន្ធ SPAN គឺមានភាពទំនើបជាងប្រព័ន្ធ FMIS ហើយជំហានត្រៀម មុននឹងដាក់ឱ្យអនុវត្តប្រព័ន្ធ SPAN ក៏មានរយៈពេលយូរផងដែរ។ បើទោះជាយ៉ាងនេះក្តី លោក កែ ប៊ុនឡេង បានបញ្ជាក់ដោយសុទិដ្ឋិនិយមថា យើងសង្ឃឹមថាការអនុវត្តគម្រោងប្រព័ន្ធ FMIS របស់កម្ពុជា នឹងដំណើរការបានលឿនជាងប្រព័ន្ធ SPAN នាពេលអនាគត ដោយសារការប្តេជ្ញាចិត្តក្នុងការប្រើប្រាស់ប្រព័ន្ធទាំងថ្នាក់ដឹកនាំ និងមន្រ្តីប្រើប្រាស់។
លោកបានបន្ថែមថា ប្រព័ន្ធ FMIS បានជួយសម្រួលដល់ការងារមន្រ្តីរតនាគារខេត្តជាច្រើន ដែលបច្ចុប្បន្ននេះគឺអាចបោះពុម្ពមូលប្បទានប័ត្រចេញពីប្រព័ន្ធដើម្បីទូទាត់ និងអាចបោះពុម្ពសក្ខីបត្រ និងលេខនា បានរហ័សតាមប្រព័ន្ធផងដែរ។
បន្ទាប់ពីដំណើរទស្សនកិច្ចទៅប្រទេសឥណ្ឌូនេស៊ី លោក សុខ ស្រូយ ប្រធានរតនាគារខេត្តតាកែវមានប្រសាសន៍ថា លោកនឹងយកបទពិសោធន៍ក្នុងការអនុវត្តប្រព័ន្ធ SPAN ដើម្បីជាគំនិតក្នុងការចូលរូមជំរុញឱ្យមន្រ្តីប្រើប្រាស់ប្រព័ន្ធនៅក្នុងរតនាគារ បញ្ចូលប្រតិបត្តិការក្នុងប្រព័ន្ធឱ្យបានឆាប់រហ័ស ដើម្បីប្រមូលទិន្នន័យឆ្នាំ២០១៦ ឱ្យបានគ្រប់ជ្រុងជ្រោយ។ លោកបានបញ្ជាក់ថា “ដោយមានការលើកទឹកចិត្តពីថ្នាក់ដឹកនាំ និងការខិតខំប្រឹងប្រែងរបស់មន្រ្តីរតនាគារក្នុងការប្រើប្រាស់ប្រព័ន្ធ យើងរំពឹងទុកថា នៅថ្ងៃអនាគតប្រទេសកម្ពុជានឹងប្រើប្រាស់ប្រព័ន្ធ FMIS បានរលូនបានដូច SPAN នៅប្រទេសឥណ្ឌូនេស៊ីផងដែរ”។
គួរបញ្ជាក់ផងដែរថា ឯកឧត្តមបណ្ឌិត អូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានអនុញ្ញាតឱ្យថ្នាក់ដឹកនាំ និងមន្រ្តីដែលជាក្រុមការងារគ្រប់គ្រងកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈចំនួន ២៧រូប ទៅចូលរួមដំណើរទស្សនកិច្ចសិក្សាអំពីប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ (Financial Management Information System – FMIS) ដែលមានឈ្មោះថាប្រព័ន្ធ SPAN ចាប់ពីថ្ងៃទី២៦ ដល់ថ្ងៃទី២៨ ខែកក្កដា ឆ្នាំ២០១៦ នៅទីក្រុងចាកាតា ប្រទេសឥណ្ឌូនេស៊ី។ ក្នុងចំំណោមមន្ត្រីទាំងអស់ ក្នុងនោះមានប្រធានរតនាគាររាជធានី-ខេត្តចំនួន៩ បានចូលរួមក្នុងដំណើរទស្សនកិច្ចសិក្សានោះផងដែរគឺ ប្រធានរតនាគាររាជធានីភ្នំពេញ រតនាគារខេត្តព្រៃវែង រតនាគារខេត្តឧត្តរមានជ័យ រតនាគារខេត្តកោះកុង រតនាគារខេត្តកំពង់ធំ រតនាគារខេត្តក្រចេះ រតនាគារខេត្តបាត់ដំបង រតនាគារខេត្តតាកែវ និងរតនាគារខេត្តស្ទឹងត្រែង៕