4
Jan, 2016
កិច្ចប្រជុំក្រុមការងារគ្រប់គ្រងគម្រោង FMIS របស់នាយកដ្ឋានព័ត៌មានវិទ្យា ដើម្បីត្រៀមខ្លួនក្នុងការចុះជួយគាំទ្រ និង បង្ហាត់បង្ហាញដល់អ្នកប្រើប្រាស់ប្រព័ន្ធតាមរតនាគាររាជធានី-ខេត្ត
កាលពីថ្ងៃទី ៣០ ខែ ធ្នូ ឆ្នាំ ២០១៥ នៅសាលប្រជុំនាយកដ្ឋានព័ត៌មានវិទ្យាអាគារ “ខ” ជាន់ទី៦ នៃទីស្តីការក្រសួងសេដ្ឋកិច្ច និង ហិរញ្ញវត្ថុ វេលាម៉ោង ៤:០០ នាទីល្ងាច ក្រុមការងារគ្រប់គ្រងគម្រោង FMIS របស់នាយកដ្ឋានព័ត៌មានវិទ្យា បានរៀបចំកិច្ចប្រជុំមួយ ដើម្បីត្រៀមខ្លួនរួចជាស្រេចក្នុងការចុះជួយគាំទ្រ និង បង្ហាត់បង្ហាញដោយផ្ទាល់នៅតាមរតនាគាររាជធានី-ខេត្ត ទាំង ២៥ ដែលនឹងត្រូវចាប់ផ្តើមដាក់ឱ្យប្រើប្រាស់ប្រព័ន្ធ FMIS ចាប់ពីថ្ងៃទី ០៤ ខែ មករា ឆ្នាំ ២០១៦ រហូតដល់ ខែ មីនា ឆ្នាំ ២០១៦ ដែលដឹកនាំដោយថ្នាក់ដឹកនាំនៃនាយកដ្ឋានព័ត៌មានវិទ្យា ។ កិច្ចប្រជុំបានផ្តោតលើចំណុចសំខាន់ៗដូចខាងក្រោម៖
១. ការត្រៀមឯកសារលិខិតស្នាមសម្រាប់ការបង្ហាត់បង្ហាញ និង ការចុះបេសកកម្ម
ប្រធានក្រុមការងារនីមួយៗ ដែលបានបែងចែកត្រូវមានទំនួលខុសត្រូវខ្ពស់សម្រាប់ការងារចាត់ចែងសមាជិកក្រុមរបស់ខ្លួនក្នុងការងារអនុវត្តការងារ ដោយធ្វើយ៉ាងណាត្រូវមានការត្រួតពិនិត្យគ្រប់ជ្រុងជ្រោយនូវរាល់ឯកសារដែលត្រូវយកទៅបំពេញបេសកម្មដែលបានគ្រោងទុក ។ ប្រធានក្រុមការងារ និង សមាជិកបានទទួលឯកសារកាលវិភាគចុះបំពេញបេសកកម្ម ដើម្បីត្រៀមខ្លួនអនុវត្តការងារឱ្យបានជោគជ័យ ។
២. យន្តការនៃការដោះស្រាយបញ្ហាប្រឈមដែលនឹងកើតមានឡើង
នៅពេលដែលមានបញ្ហាប្រឈមផ្សេងៗកើតឡើង ប្រធានក្រុមត្រូវដោះស្រាយដោយផ្ទាល់នៅរតនាគាររាជធានី-ខេត្តនីមួយៗ ដោយធ្វើការពិភាក្សាជាមួយក្រុមការងាររបស់ក្រុមហ៊ុនផ្គត់ផ្គង់ប្រព័ន្ធ ។ ប៉ុន្តែប្រសិនបើបញ្ហាប្រឈមទាំងនោះ ពុំអាចដោះស្រាយបានត្រូវរាយការណ៍ជូនមកថ្នាក់កណ្តាលដើម្បីជួយដោះស្រាយបន្ត រហូតបញ្ហាដោះស្រាយបានរួចរាល់ ។
៣. ការរៀបចំរបាយការណ៍សម្រាប់បេសកកម្មនៅខេត្តនីមួយៗ
ប្រធានក្រុមការងារនីមួយៗ តម្រូវឱ្យធ្វើរបាយណ៍សង្ខេបខ្លីៗជាប្រចាំថ្ងៃសម្រាប់ដាក់ជូនថ្នាក់ដឹកនាំនៃនាយកដ្ឋានព័ត៌មានវិទ្យាដើម្បីធ្វើជាឯកសារយោង ជាពិសេសបញ្ហាប្រឈមនានាដែលកើតមានឡើង និង ពុំអាចដោះស្រាយបានក្នុងកម្រិតបច្ចេកទេស ។
៤. បញ្ហាផ្សេងៗ
ក្រុមការងារនីមួយៗបាន លើកឡើងជាសំណួរផ្សេងៗពាក់ព័ន្ធនឹងការចុះអនុវត្តការងារ និង ស្នើសុំការណែនាំផ្សេងៗក្នុងការចាត់ចែងរថយន្តដើម្បីត្រៀមចុះបេសកកម្មដោយរលូន ។
ជាចុងក្រោយ ថ្នាក់ដឹកនាំរបស់ក្រុមការងារនៃនាយកដ្ឋានព័ត៌មានវិទ្យា បានណែនាំឱ្យក្រុមអនុវត្តការងារដែលត្រូវចុះបេសកម្មទាំងអស់ត្រូវមានទំនួលខុសត្រូវច្បាស់លាស់ ជាពិសេសមន្រ្តីដែលទទួលខុសត្រូវជាប្រធានក្រុមការងារនីមួយៗ ដែលត្រូវជួយរាជធានី-ខេត្តចំនួន ៤ ស្របពេលគ្នា ហើយរយៈពេលមួយសប្តាហ៍ម្តង រហូតដល់សប្តាហ៍ទី ១ នៃខែ មីនា ឆ្នាំ ២០១៦ ។ លើសពីនេះ តម្រូវឱ្យមានការទំនាក់ទំនងមកថ្នាក់កណ្តាលប្រកបដោយបុរេសកម្ម អំពីបញ្ហាប្រឈមដែលពុំអាចដោះស្រាយបាន ដើម្បីចៀសវាងដល់ការរាំងស្ទះការងាររបស់រតនាគាររាជធានី-ខេត្ត ។
កិច្ចប្រជុំត្រូវបានបញ្ចប់នៅវេលាម៉ោង ៥:០០ នាទី ល្ងាច ប្រកបដោយសាមគ្គីភាព និង ឆន្ទៈ ក្នុងការឈានឆ្ពោះទៅរក ការសម្រេចឱ្យបាននូវការចុះបេសកកម្មរបស់ក្រុមការងារនៅតាមរតនាគាររាជធានី-ខេត្តទាំង ២៥ ប្រកបដោយភាពជោគជ័យ។