26
Oct, 2015
ការទំនាក់ទំនងផ្សព្វផ្សាយផ្ទាល់ជាមួយថ្នាក់ដឹកនាំ និងមន្រ្តីនៃរតនាគារខេត្តចំនួន ១២ ក្នុងក្របខ័ណ្ឌនៃការអនុវត្តគម្រោង FMIS
ចាប់ពី ថ្ងៃទី ១៣ ខែ សីហា រហូតដល់ ថ្ងៃទី ១១ ខែ កញ្ញា ឆ្នាំ ២០១៥ ក្រុមការងារគ្រប់គ្រងការផ្លាស់ប្តូរ និងហេដ្ឋារចនាសម្ព័ន្ធរបស់នាយកដ្ឋានព័ត៌មានវិទ្យានៃគម្រោង FMIS បានចុះបំពេញបេសកកម្មទៅកាន់រតនាគារខេត្តចំនួន ១២ ដោយចុះទៅកាន់រតនាគារខេត្តចំនួនពីរក្នុងមួយសប្តាហ៍ ក្នុងគោលបំណង ទី១. ផ្សព្វផ្សាយអំពីវឌ្ឍនភាពដែលក្រុមការងារបានអនុវត្តកន្លងមក, លើកពីកិច្ចការងារបន្តដែលត្រូវអនុវត្ត, និង បង្ហាញពីអត្ថប្រយោជន៍នៃ ការប្រើប្រាស់ប្រព័ន្ធ FMIS ដើម្បីកៀរគរការចូលរួមអនុវត្តរឹតតែខ្លាំងឡើង ទី២. ជ្រើសរើសបណ្តាញភ្នាក់ងារផ្លាស់ប្តូរនៅតាមរតនាគាររាជធានី-ខេត្ត សម្រាប់ដើរតួរជាភ្នាក់ងារក្នុងការផ្សព្វផ្សាយ និងជួយសម្របសម្រួលដល់ការងារចាំបាច់ផ្សេងៗរបស់ក្រុមការងារគ្រប់គ្រងការផ្លាស់ប្តូរនៅថ្នាក់កណ្តាល ទី៣. ពិនិត្យទីតាំងជាក់ស្តែងដែលអាចនឹងផ្លាស់ប្តូរ និងការតភ្ជាប់បណ្តាញពីមជ្ឈមណ្ឌលទិន្នន័យនៅក្រសួងសេដ្ឋកិច្ចនិងហិរញ្ញវត្ថុ និង ទី៤. ស្នើឱ្យថ្នាក់ដឹកនាំ និងមន្រ្តីបំពេញកម្រងឯកសារស្ទង់មតិអំពីការយល់ដឹងអំពីគម្រោង FMIS, ឆ្លើយសំណួររបស់មន្រ្តីរតនាគារខេត្ត, និងស្រង់នូវមតិដែលជាកង្វល់ឬបញ្ហាប្រឈម និងសំណូមពរផ្សេងៗពាក់ព័ន្ធនឹងការដាក់ឱ្យអនុវត្តប្រព័ន្ធ FMIS របស់មន្រ្តីរតនាគារខេត្តដើម្បីពិនិត្យលទ្ធភាពដោះស្រាយឱ្យទាន់ពេលវេលា និងដាក់ជូនថ្នាក់ដឹកនាំដោះស្រាយប្រសិនបើចាំបាច់។
ក្នុងកិច្ចដំណើរបេសកកម្មក្រុមការងារបានអនុវត្តភារកិច្ចនៅតាមរតនាគារខេត្តនីមួយៗដូចខាងក្រោម៖
១. បានធ្វើបទបង្ហាញពាក់ព័ន្ធនឹងការអនុវត្តគម្រោង FMIS ដោយ បានបង្ហាញពីវឌ្ឍនភាពរួមនៃការអនុវត្តគម្រោងតាំងពីពេលចាប់ផ្តើមរហូតដល់ពេលបច្ចុប្បន្ន, អំពីស្ថានភាពបច្ចុប្បន្ននៃការអនុវត្តគម្រោងពាក់ព័ន្ធសកម្មភាពគន្លឹះ, មុខងារដែលត្រូវអនុវត្តនៅរតនាគាររាជធានី-ខេត្ត, និងអត្ថប្រយោជន៍ផ្សេងៗដែលរតនាគារខេត្តនឹងទទួលបាននៅពេលមានប្រព័ន្ធ FMIS។ ជាមួយគ្នាដែរ ក្រុមការងារបានជំរុញលើកទឹកចិត្តដល់ថ្នាក់ដឹកនាំ និងមន្រ្តីនៃរតនាគារខេត្ត ឱ្យចូលរួមសួរសំណួរទាំងឡាយដែលមាន ទាំងនៅក្នុងពេលកំពុងធ្វើបទបង្ហាញ និងនៅពេលបញ្ចប់ ក្នុងគោលបំណងបង្កើននូវភាពជិតស្និទ្ធ និងការឆ្លើយឆ្លងគ្នាទៅវិញទៅមក ដើម្បីបកស្រាយចម្ងល់ផ្សេងៗ ឬពន្យល់បកស្រាយភ្លាមៗជូនដល់ថ្នាក់ដឹកនាំ និងមន្រ្តីនៃរតនាគារខេត្ត។ ក្រុមការងារក៏បានចែកជូននូវឯកសារផ្សេងៗ ដូចជា ឯកសារបទបង្ហាញ, ប្រកាសព័ត៌មាន, ព័ត៌មានបច្ចុប្បន្នភាព និងព្រឹត្តិបត្រព័ត៌មានគម្រោង FMIS ជាដើម។
២. ថ្នាក់ដឹកនាំ និងមន្រ្តីរតនាគារខេត្ត ត្រូវបានស្នើសុំឱ្យបំពេញកម្រងឯកសារស្ទង់មតិស្តីអំពី ការត្រៀមខ្លួនរួចរាល់សម្រាប់ការផ្លាស់ប្តូរ (Change Readiness Survey) ដោយប្រើប្រាស់រយៈពេលពី ១៥ ទៅ ២០ នាទី ដើម្បីស្ទាបស្ទង់ពីការយល់ដឹង និង បញ្ហាប្រឈម ឬកង្វល់ផ្សេងៗអំពីការអនុវត្តប្រព័ន្ធ FMIS ដែលជាធាតុចូលដ៏សំខាន់សម្រាប់ក្រុមការងារគ្រប់គ្រងការផ្លាស់ប្តូរធ្វើការវិភាគ និង បន្តកែលម្អលើយុទ្ធសាស្រ្តនិងសកម្មភាពគ្រប់គ្រងការផ្លាស់ប្តូរ ជាពិសេសផែនការទំនាក់ទំនងផ្សព្វផ្សាយ (Communication Plan)។
៣. ក្រុមការងារបានលើកឡើងអំពីតម្រូវការជ្រើសរើសភ្នាក់ងារផ្លាស់ប្តូរ (Change Agent) មួយរូបពីរតនាគារខេត្តនីមួយៗ ដោយបានបង្ហាញអំពីលក្ខខណ្ឌជ្រើសរើស និង តួនាទីរបស់ភ្នាក់ងារផ្លាស់ប្តូរជូនថ្នាក់ដឹកនាំរតនាគារខេត្ត ដើម្បីស្នើសុំជ្រើសរើសមន្រ្តីដែលមានលក្ខខណ្ឌគ្រប់គ្រាន់ និងមានលទ្ធភាពបំពេញតួនាទីដូចដែលបានបង្ហាញ។
៤. មន្រ្តីបច្ចេកទេសនៃនាយកដ្ឋានព័ត៌មានវិទ្យាផ្នែកហេដ្ឋារចនា-សម្ព័ន្ធបច្ចេកវិទ្យាព័ត៌មាននិងគមនាគមន៍ក៏បានធ្វើការសិក្សាអំពីទីតាំង និងការតភ្ជាប់បណ្តាញ ដែលហៅថា Dedicated Line ពីមជ្ឈមណ្ឌលទិន្នន័យរបស់ប្រព័ន្ធ FMIS នៅក្រសួងសេដ្ឋកិច្ចនិងហិរញ្ញវត្ថុរបស់ក្រុមហ៊ុន EZECOM ដោយបានធ្វើការត្រួតពិនិត្យទៅលើគុណភាព Bandwidth និងបច្ចេកទេសនៃការតភ្ជាប់ខ្សែ Dedicated Lineចូលទៅក្នុងទីតាំងរតនាគារខេត្តនីមួយៗ។
បន្ទាប់ពីបានបញ្ចប់បេសកកម្មនេះ ក្រុមការងារបានទទួលលទ្ធផលយ៉ាងផ្លែផ្កាដូចការរំពឹងទុក។ ថ្នាក់ដឹកនាំ និងមន្រ្តីបានយល់កាន់តែច្បាស់អំពីការអនុវត្តគម្រោង FMIS ជាពិសេសវឌ្ឍនភាពគួរឱ្យកត់សម្គាល់, ផលប្រយោជន៍ដែលរំពឹងទុក, មុខងារដែលរតនាគារខេត្តនឹងប្រើប្រាស់នៅក្នុងប្រព័ន្ធ FMIS, ពេលវេលាសម្រាប់ទទួលការបណ្តុះបណ្តាលលើការប្រើប្រាស់ប្រព័ន្ធ និងដំណាក់កាលនីមួយៗនៃការដាក់ឱ្យប្រើប្រាស់ប្រព័ន្ធ FMIS ជាផ្លូវការនៅអគ្គនាយកដ្ឋានពាក់ព័ន្ធ និងរតនាគាររាជធានី-ខេត្ត នាពេលឆាប់ៗខាងមុខ។ ជាលទ្ធផល់ ថ្នាក់ដឹកនាំនឹងមន្រ្តីទាំងអស់ មានចំណាប់អារម្មណ៍លើការប្រើប្រាស់ប្រព័ន្ធ FMIS កាន់តែខ្លាំងឡើង ដោយសារប្រព័ន្ធនេះ នឹងជួយសម្រួលដល់ការលំបាកក្នុងការបំពេញការងារប្រចាំថ្ងៃដែលកំពុងជួបប្រទះ។
កម្រងឯកសារស្ទង់មតិ ត្រូវបានណែនាំឱ្យថ្នាក់ដឹកនាំ និងមន្រ្តីរតនាគារខេត្តនីមួយៗបំពេញ និងបានប្រមូលភ្លាមៗ ហើយក្រុមការងារបានវិភាគជាបណ្តើរៗ ដោយបានបង្ហាញលទ្ធផលនៃការវិភាគនៅលើព្រឹត្តិបត្រព័ត៌មានគម្រោង FMISលេខ ០០៦។ តាមរយៈឯកសារស្ទង់មតិនេះ ក្រុមការងាររួមជាមួយជំនាញការផ្នែកគ្រប់គ្រងការផ្លាស់ប្តូររបស់ ធនាគារពិភពលោក បានដាក់ចេញនូវផែនការសកម្មភាពរួមសម្រាប់ដំណាក់កាលបន្តបន្ទាប់នៃការដាក់ឱ្យប្រើប្រាស់ប្រព័ន្ធ FMIS ជាផ្លូវការ និងផែនការសកម្មភាពដោយឡែកសម្រាប់អនុវត្តការងារគ្រប់គ្រងការផ្លាស់ប្តូរ មុនពេលដាក់ឱ្យប្រើប្រាស់ប្រព័ន្ធ FMIS ជាផ្លូវការដំណាក់កាលទី ២ (FMIS Go-Live 2) នៃជំហានទី១ ដែលគ្រោងនឹងចាប់ផ្តើមនៅក្នុងខែ តុលា ឆ្នាំ ២០១៥ នាពេលដ៏ខ្លីខាងមុខនេះ ដើម្បីធានាឱ្យបាននូវភាពជោគជ័យ, ប្រសិទ្ធភាព, និង ប្រកបដោយភាពរលូន។
ក្រុមការងារបានទទួលមន្រ្តីជាភ្នាក់ងារផ្លាស់ប្តូរចំនួន ១២ រូប ដែលបានចាត់តាំងដោយថ្នាក់ដឹកនាំរតនាគារខេត្តទាំង ១២ ដូចការគ្រោងទុក។ ក្រុមការងារនឹងបន្តជ្រើសរើសមន្រ្តីជាភ្នាក់ងារផ្លាស់ប្តូរនៅតាមរតនាគាររាជធានី-ខេត្ត ដែលនៅសេសសល់នៅដំណាក់កាលបន្ទាប់។ ចំណែកការតភ្ជាប់បណ្តាញគឺត្រូវបានត្រួតពិនិត្យ និងធ្វើការសាកល្បងរួចរាល់ផងដែរ។
ជារួម ចំពោះបញ្ហាប្រឈម ឬកង្វល់ និងសំណូមពរភាគច្រើនរបស់រតនាគារខេត្តគឺ អាចដោះស្រាយបាន ដោយសារក្រុមការងារក៏បានគិតគូរ និង ពិភាក្សាអំពីបញ្ហា និងកង្វល់ទាំងអស់នេះ ជាពិសេសទាក់ទងនឹងការរៀបចំវគ្គបណ្តុះបណ្តាលនានា ដែលកន្លងមកក្រុមការងារបានខិតខំពង្រឹងសមត្ថភាពមន្រ្តីរបស់ខ្លួនដែលនឹងក្លាយជាគ្រូបង្គោល និង បន្តកែលម្អផែនការធ្វើយ៉ាងណាបណ្តុះបណ្តាលមន្រ្តីរហូតទាល់តែមានសមត្ថភាពគ្រប់គ្រាន់ក្នុងការអនុវត្តការងារដោយប្រើប្រាស់ប្រព័ន្ធ FMIS។ ចំណែកកង្វល់ ឬបញ្ហា និងសំណូមពរមួយចំនួនទៀតអាចនឹងត្រូវដោះស្រាយបាននៅពេលដែលប្រើប្រាស់ប្រព័ន្ធ FMIS។ យ៉ាងណាមិញ ក្រុមការងារនៅមានបញ្ហាប្រឈមមួយធំទាក់ទងនឹងការដាច់ចរន្តអគ្គិសនីដែលរតនាគារខេត្តភាគច្រើនបានជួបប្រទះ ហើយបញ្ហានេះធ្វើឱ្យក្រុមការងារក៏ដូចជាមន្រ្តីរតនាគារខេត្តមានការព្រួយបារម្ភ ពីព្រោះបញ្ហារអាក់រអួល និងដាច់ចរន្តអគ្គិសនី គឺជាទឡ្ហីករដ៏ចម្បង ដែលអាចធ្វើឱ្យដំណើរការរបស់ប្រព័ន្ធ FMIS មានភាពរអាក់រអួល និងបណ្តាលឱ្យឧបករណ៍បច្ចេកវិទ្យាទាំងឡាយដែលត្រូវដំឡើងសម្រាប់ប្រព័ន្ធ FMIS នឹងងាយខូចខាត។ ហេតុនេះ ចំពោះបញ្ហាប្រឈមមួយនេះ ក្រុមការងារនឹងដាក់ជាអាទិភាពដើម្បីដោះស្រាយជាចាំបាច់ ដោយសារនៅក្នុងផែនការថវិកាឆ្នាំ ២០១៥ របស់គម្រោង FMIS ពុំមានថវិកាសម្រាប់ទិញម៉ាស៊ីនភ្លើង, ម៉ាស៊ីនត្រជាក់, និង ឧបករណ៍ជំនួយស្ថិរភាពចរន្តអគ្គិសនីសម្រាប់រតនាគារខេត្តនោះឡើយ ។ ក្នុងករណីដែលក្រុមការងារពុំអាចដោះស្រាយបាន ក្រុមការងារនឹងដាក់ជូនថ្នាក់ដឹកនាំក្រសួងសេដ្ឋកិច្ច និង ហិរញ្ញវត្ថុ ដើម្បីផ្តល់ជាអនុសាន៍ ឬដំណោះស្រាយ។