11
Jul, 2015
កិច្ចប្រជុំស្តីពី “ដំណាក់កាល និង សកម្មភាពនៃការដាក់ឱ្យអនុវត្តប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសារធារណៈ (FMIS)”
ក្រុមការងារគម្រោង (FMIS) បានរៀបចំកិច្ចប្រជុំស្តីពី “ដំណាក់កាល និង សកម្មភាពនៃការដាក់ឱ្យអនុវត្ត ប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសារធារណៈ (FMIS)” ក្រោមការដឹកនាំដ៏ខ្ពង់ខ្ពស់របស់ ឯកឧត្តមបណ្ឌិត ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារគ្រប់គ្រងគម្រោង FMIS កាលពីថ្ងៃទី ០១ ខែកក្កដា ឆ្នាំ២០១៥ វេលាម៉ោង ៩:០០នាទីព្រឹក នៅសាលប្រជុំអាគារ “ឃ” ជាន់ផ្ទាល់ដីនៃទីស្តីការក្រសួងសេដ្ឋកិច្ចនិងហិរញ្ញវត្ថុ។ កិច្ចប្រជុំនេះមានការអញ្ជើញចូលរួមពីថ្នាក់ដឹកនាំអគ្គនាយកដ្ឋាន-នាយកដ្ឋានពាក់ព័ន្ធគន្លឹះ, អគ្គនាយកដ្ឋាន-នាយកដ្ឋានពាក់ព័ន្ធដទៃទៀតនៃក្រសួងសេដ្ឋកិច្ចនិងហិរញ្ញវត្ថុ, ក្រុមប្រឹក្សាជាតិគណនេយ្យ, ក្រុមការងារ FMWG, និងមន្រ្តីដែលពាក់ព័ន្ធទាំងឡាយ។
កិច្ចប្រជុំនេះ មានគោលបំណងជាសំខាន់ដើម្បីបង្ហាញជូនថ្នាក់ដឹកនាំអគ្គនាយកដ្ឋាន-នាយកដ្ឋានទាំងអស់ និងមន្រ្តីពាក់ព័ន្ធ ឱ្យឃើញ និងយល់កាន់តែច្បាស់អំពីការអនុវត្តប្រព័ន្ធ FMIS ដែលនឹងត្រូវដាក់ឱ្យប្រើប្រាស់ជាផ្លូវការដំណាក់កាលទី១ ( Go-live 1) នៅថ្ងៃទី ២០ ខែ កក្កដា ឆ្នាំ ២០១៥ ដែលមាន ២មុខងារ (មុខងារសៀវភៅធំ និងមុខងារវិភាជន៍ថវិកា), ដំណាក់កាលទី២ ដែលនឹងត្រូវអនុវត្តគ្រប់មុខងារទាំងអស់សម្រាប់ថ្នាក់ជាតិនៅ ថ្ងៃទី ២១ ខែតុលា ឆ្នាំ២០១៥, និង ដំណាក់កាលទី៣ ដែលអនុវត្តបន្តតាមលំដាប់លំដោយទៅដល់រតនាគាររាជធានី-ខេត្តសម្រាប់ថ្នាក់ក្រោមជាតិ នៅថ្ងៃទី០៤ ខែមករា ឆ្នាំ២០១៦។ ការធ្វើបទបង្ហាញរបស់ក្រុមការងារគម្រោង FMIS បានផ្តោតទៅលើចំណុចសំខាន់ៗដូចខាងក្រោម៖
- វឌ្ឍនភាពគម្រោង FMIS និង ទិដ្ឋភាពទូទៅរបស់ FMIS ដំណាក់កាលទី ១ (FMIS Go-Live ១)៖ បានបង្ហាញអំពីវឌ្ឍភាពជាសារវ័ន្តនៃការអនុវត្តគម្រោង FMIS ដែលមានប្រាំដំណាក់កាល ដោយបានឆ្លងផុតដំណាក់កាលធំៗចំនួនពីរ និងកំពុងបញ្ចប់ដំណាក់កាលទី៣ (ស្ថាបនាប្រព័ន្ធ) ព្រមទាំង ឆ្លងចូលអនុវត្តដំណាក់កាលទី ៤ (អន្តរកាល) និងទី៥ (ការដាក់ឱ្យប្រើប្រាស់ប្រព័ន្ធជាផ្លូវការ)។ នាពេលនេះក្រុមការងារគម្រោងបានកំពុងត្រៀមលក្ខណៈដើម្បីដាក់ឱ្យប្រើប្រាស់ប្រព័ន្ធ FMIS ជាផ្លូវការដំណាក់កាលទី ១ ដែលនឹងត្រូវចាប់ផ្តើមនៅថ្ងៃទី ២០ ខែកក្កដា ឆ្នាំ២០១៥ ដោយមាន២ មុខងារ។
- មុខងាររបស់តួអង្គពាក់ព័ន្ធ៖ តួអង្គពាក់ព័ន្ធរួមមានអគ្គនាយកដ្ឋានថវិកា, អគ្គនាយកដ្ឋានរតនាគារជាតិ និងនាយកដ្ឋានព័ត៌មានវិទ្យា ដែលនឹងត្រូវចូលទៅអនុវត្តតាមតួនាទីដែលបានបែងចែករួចរាល់ ចំពោះមុខងារទាំង២។
- ការត្រៀមលក្ខណៈរបស់តួអង្គពាក់ព័ន្ធ៖ ក្នុងការដាក់ឱ្យប្រើប្រាស់ប្រព័ន្ធ FMIS ជាផ្លូវការដំណាក់កាលទី១ នេះ តួអង្គពាក់ព័ន្ធទាំងអស់ នឹងត្រូវទទួលការបណ្ដុះបណ្ដាលឱ្យចេះប្រាកដទៅលើតួនាទីថ្មីសម្រាប់ការងារ FMIS និងអនុវត្តតាមភារកិច្ចរៀងៗខ្លួន ដូចជាការជួយសម្របសម្រួលក្នុងការប្រមូលទិន្នន័យ និងការសម្អាតទិន្នន័យឥណទានថវិការចុងក្រោយ និងសមតុល្យគណនេយ្យជាដើម ក្នុងគោលបំណងធានាឱ្យបាននូវការដាក់ឱ្យប្រើប្រាស់ប្រព័ន្ធ FMIS ប្រកបដោយភាពរលូន។
- ដំណាក់កាលបន្តរបស់ FMIS៖ ផ្អែកតាមផែនការដែលបានគ្រោងទុក ការដាក់ឱ្យប្រើប្រាស់ប្រព័ន្ធ FMIS ដំណាក់កាលទី ២ និងចាប់ផ្តើមនៅថ្ងៃទី ២១ តុលា ២០១៥ ដោយនឹងចាប់អនុវត្តគ្រប់មុខងារ (មុខងារវិភាជន៍ថវិកា (BA), មុខងារការទិញ (PO), មុខងារត្រូវសង (AP), មុខងារត្រូេវទារ (AR), មុខងារគ្រប់គ្រងសាច់ប្រាក់ (CM), មុខងារសៀវភៅធំ (GL)) ហើយដាក់ឱ្យអនុវត្តទៅលើអគ្គនាយកដ្ឋានពាក់ព័ន្ធ (អគ្គនាយកដ្ឋានរតនាគារជាតិ, អគ្គនាយកដ្ឋានថវិកា, អគ្គនាយដ្ឋានសវនកម្មផ្ទៃក្នុង, អគ្គាធិការដ្ឋាន, អគ្គនាយកដ្ឋានលទ្ធកម្មសាធារណៈ និងអគ្គនាយដ្ឋានហិរញ្ញវត្ថុរដ្ឋបាលថ្នាក់ក្រោមជាតិ)។ សំរាប់ដំណាក់ទី ៣ និងចាប់ផ្តើមនៅថ្ងៃទី ០៤ មករា ២០១៦ ដោយនឹងអនុវត្តគ្រប់ម៉ូឌុល ដោយអនុវត្តបន្តដល់ថ្នាក់ក្រោមជាតិ (រតនាគាររាជធានី-ខេត្ត)។ ជាចុងក្រោយ កិច្ចសន្យាប្រព័ន្ធ FMIS និងបញ្ចប់ជាស្ថាពរនៅថ្ងៃទី ៣១ មិនា ២០១៦។
បន្ទាប់ពីបានស្តាប់ការធ្វើបទបង្ហាញដោយក្រុមការងារគម្រោងរួចមក ថ្នាក់ដឹកនាំពាក់ព័ន្ធបានធ្វើការពិភាក្សាទៅលើតួអង្គពាក់ព័ន្ធ ដូចជាកម្រិត និងផលប៉ះពាល់ នៃការអនុវត្តប្រព័ន្ធ FMIS ដែលនឹងត្រូវដាក់ឱ្យប្រើប្រាស់ជាផ្លូវការដំណាក់កាលទី១ (1st Go-live) នាពេលដ៏ខ្លីខាងមុខ។ ដោយចំណុចទាំងនោះរួមមានការផ្គត់ផ្គង់ និងដំឡើងឧបករណ៍ឱ្យទាន់ពេលវេលាមុននឹងការដាក់ឱ្យប្រើប្រាស់ជាផ្លូវការដំណាក់កាលទី១, តួនាទីនិងភារកិច្ចក្នុងការធ្វើនិយ័តកម្មថវិកាឬកែតម្រូវឥណទានថវិកា, សមត្ថកិច្ចពាក់ព័ន្ធបញ្ហារជ្ជទេយ្យបុរេប្រទាន, និងកម្រិតលម្អិតដែលត្រូវកត់ត្រាតាមដានការអនុវត្តចំណាយដល់អង្គភាពថវិកាចំពោះថវិកាកម្មវិធី។ ជាលទ្ធផល អង្គប្រជុំបានសម្រេចឱ្យមានកិច្ចពិភាក្សាបន្តជាមួយអ្នកពាក់ព័ន្ធដើម្បីដោះស្រាយបញ្ហាប្រឈមនានាដែលបានលើកឡើងដោយសារបញ្ហាទាំងនោះត្រូវការពិភាក្សាគ្នាដើម្បីឱ្យយល់ស៊ីជម្រៅបន្ថែមពីក្រុមការងារបច្ចេកទេស និងធ្វើការសម្រេចចិត្តឱ្យបានមុនពេលដែលត្រូវដាក់ឱ្យប្រើប្រាស់ប្រព័ន្ធនៅដំណាក់កាលទី១ នេះ។
ជាកិច្ចបញ្ចប់នៃអង្គប្រជុំ ឯកឧត្តមបណ្ឌិត ហ៊ាន សាហ៊ីប បានធ្វើការបូកសរុបជារួមថា ការដាក់ប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ (FMIS) ឱ្យប្រើប្រាស់ជាផ្លូវការដំណាក់កាលទី១ (Go-live 1) នៅថ្ងៃទី ២០ ខែ កក្កដា ឆ្នាំ ២០១៥ ខាងមុខនេះ គឺទាមទារជាចាំបាច់ឱ្យមានការសហការ សម្របសម្រួលពីសំណាក់ថ្នាក់ដឹកនាំ និងមន្រ្តីជាអ្នកប្រើប្រាស់ប្រព័ន្ធ FMIS ផ្ទាល់ និង បានស្នើសុំថ្នាក់ដឹកនាំ និងមន្រ្តីជាអ្នកប្រើប្រាស់ប្រព័ន្ធឱ្យត្រៀមខ្លួនសម្រាប់ការប្រើប្រាស់ប្រព័ន្ធ FMIS ជាពិសេសត្រូវមានការចូលរួមក្នុងការបណ្តុះបណ្តាល និង ត្រូវពង្រឹងសមត្ថភាពឱ្យបានពេញលេញ។ ជាចុងក្រោយ ឯកឧត្តមបណ្ឌិត បានជំរុញលើកទឹកចិត្តឱ្យក្រុមការងារ FMWG ត្រូវបន្តចូលរួមអនុវត្តការងារឱ្យសម្រេចតាមផែនការសម្រាប់ការដាក់ឱ្យប្រើប្រាស់ប្រព័ន្ធ FMIS នាពេលខាងមុខនេះ ឱ្យប្រកបដោយភាពរលូន។
កិច្ចប្រជុំ បានបញ្ចប់នៅវេលាម៉ោង ១១:៣០នាទីព្រឹក ប្រកបដោយភាពភាពស្និទ្ធស្នាល និងសាមគ្គីភាពជាធ្លុងមួយ ក្នុងការឈានឆ្ពោះទៅរកភាពជោគជ័យនៃការអនុវត្តគម្រោង FMIS។