2
Nov, 2018
ក្រុមការងារគ្រប់គ្រងគម្រោង FMIS រៀបចំធ្វើវិបស្សនាស្តីពី “ការត្រួតពិនិត្យលើបញ្ហាប្រឈម វឌ្ឍនភាព និង លទ្ធផល នៃការអនុវត្តគម្រោង FMIS សម្រាប់ ឆ្នាំ ២០១៨ និង ទិសដៅបន្តសម្រាប់ឆ្នាំ ២០១៩”
(កំពត)៖លេខាធិការដ្ឋានក្រុមការងារគ្រប់គ្រងគម្រោង FMIS នៅថ្ងៃ សុក្រ ០៩រោច ខែអស្សុជ ឆ្នាំច ព.ស ២៥៦២ ត្រូវនឹងថ្ងៃទី០២ ខែវិច្ឆិកា ឆ្នាំ២០១៨ បានរៀបចំធ្វើវិបស្សនាស្តីពី “ការត្រួតពិនិត្យលើបញ្ហាប្រឈម វឌ្ឍនភាព និង លទ្ធផល នៃការអនុវត្តគម្រោង FMIS សម្រាប់ ឆ្នាំ ២០១៨ និង ទិសដៅបន្តសម្រាប់ឆ្នាំ ២០១៩” ។ បើតាមរបៀបវារៈ កម្មវិធីផ្តោតសំខាន់លើ៖
១. ការបង្ហាញអំពីសមិទ្ធផលសម្រេចបានក្នុងឆ្នាំ២០១៨
២. ការបង្ហាញអំពី GDAP3 (2019-2020) និង ITD-DAP
៣.បទបង្ហាញស្តីអំពីវឌ្ឍនភាព បញ្ហាប្រឈម ផែនការបន្ទាប់ និងការលើកជាសំណូមពរផ្សេងៗ ដោយប្រធានការិយាល័យនីមួយៗ
៤. ការពិភាក្សាអំពីសេចក្តីសម្រេចរបស់រដ្ឋមន្ត្រីដើម្បីដាក់ចេញជាផែនការសកម្មភាព
៥. ការពិភាក្សាលើផែនការលម្អិតស្តីពីការដាក់ឱ្យអនុវត្តប្រព័ន្ធ FMIS ជាផ្លូវការឆ្នាំ ២០១៩ ។
គួរជម្រាបជូនផងដែរថា យោងតាមរបាយការណ៍វឌ្ឍនភាពប្រចាំត្រីមាសទី១ និងទី២ ឆ្នាំ២០១៨ នៃការអនុវត្តកម្មវិធីកែទម្រង់ហិរញ្ញវត្ថុសាធារណៈ បានបង្ហាញថា ប្រព័ន្ធ FMIS បានចុះកិច្ចសន្យាផ្គត់ផ្គង់ការកសាងមជ្ឈមណ្ឌលទិន្នន័យសម្រាប់អនុវត្តជំហានទី២ ជាមួយក្រសួង-ស្ថាប័នចំនួន១០ និងមន្ទីរសេដ្ឋកិច្ចនិងហិរញ្ញវត្ថុរាជធានី-ខេត្តទាំង ២៥ បន្ថែម នៅដើមឆ្នាំ២០១៩ខាងមុខ។ វឌ្ឍនភាពសំខាន់ៗរបស់គម្រោង FMIS គឺក្រុមការងារបានបន្តសហការជាមួយអគ្គនាយកដ្ឋានពន្ធដារ លើការធ្វើសន្ធនាកម្មចំនួនពីរគឺ ទី១.រៀបចំសន្ធានកម្មព័ត៌មានក្រុមហ៊ុនចុះបញ្ជីអាជីវកម្មមកប្រព័ន្ធ FMIS ដើម្បីផ្ទៀងផ្ទាត់ជាមួយក្រុមហ៊ុនដែលទទួលបានការទូទាត់ពីថវិការដ្ឋ ទី២. សន្ធានកម្មព័ត៌មានចំណូលពន្ធដារ៖ ក្រុមការងារបានជួបពិភាក្សាលម្អិតបន្ថែមឡើងវិញជាមួយអគ្គនាយកដ្ឋានរតនាគារជាតិ ដើម្បីពិនិត្យមើលតម្រូវការលម្អិតសម្រាប់ការងារសន្ធានកម្មព័ត៌មានចំណូលពន្ធដារមកប្រព័ន្ធ FMIS ព្រមទាំងបានធ្វើការទូទាត់ប្រតិបត្តិការមួយចំនួនជូនអ្នកផ្គត់ផ្គង់តាមរយៈ EFT (Electronic Fund Transfer) ការទូរទាត់តាមប្រព័ន្ធអេឡិចត្រូនិច ក្នុងប្រព័ន្ធ FMIS ។
