8
Jan, 2018
ស្វែងយល់អំពី “មុខងារទិញ” នៅក្នុងប្រព័ន្ធ FMIS
មុខងារទិញ (Purchasing Order) គឺជាមុខងារមួយសម្រាប់ធ្វើការកត់ត្រានូវប្រតិបត្តិការនៅក្នុងប្រព័ន្ធ FMIS ដែលទាក់ទងទៅនឹងសំណើសុំធានាចំណាយ និងប្រតិបត្តិការនៃការទិញទំនិញ ឬសេវា ព្រមទាំងការកត់ត្រានូវបង្កាន់ដៃប្រគល់ទទួលទំនិញ ឬសេវាជាដើម។ ហើយមុខងារមួយនេះ មានតួនាទីសម្រាប់កត់ត្រាប្រតិបត្តិការដូចជា៖
១. សំណើសុំ ឬសំណើធានាចំណាយ គឺដើម្បីធ្វើការកត់ត្រានូវសំណើសុំ ឬធានាចំណាយរបស់អង្គភាពនីមួយៗរបស់ក្រសួង-ស្ថាប័ន សម្រាប់ការទិញទំនិញ ឬសេវាជាដើម
២. ការបញ្ជាទិញទំនិញ ឬសេវា គឺដើម្បីកត់ត្រាលើប្រតិបត្តិការនៃការទិញទំនិញ ឬសេវារបស់អង្គភាពនីមួយៗនៅក្នុងក្រសួង-ស្ថាប័ន ដែលបានទិញទំនិញ ឬសេវាពីអ្នកផ្គត់ផ្គង់តាមលក្ខខណ្ឌព្រមព្រៀងក្នុងកិច្ចសន្យា បន្ទាប់ពីធ្វើការដេញថ្លៃរួចហើយ។
៣. បង្កាន់ដៃប្រគល់ទទួលទំនិញ ឬសេវា គឺដើម្បីធ្វើការកត់ត្រានូវព័ត៌មាននៃការទទួលបានទំនិញ ឬសេវា នៅពេលដែលអ្នកផ្គត់ផ្គង់បានបញ្ជូនទំនិញ ឬផ្តល់សេវាមកឱ្យអង្គភាពដែលបានធ្វើការទិញទំនិញ ឬសេវានោះ ដោយយោងទៅតាមការព្រមព្រៀងនៅក្នុងកិច្ចសន្យា។
ជាមួយគ្នានេះ មុខងារទិញ គឺមានការបែងចែកនូវតួនាទីរបស់អ្នកប្រើប្រាស់នៅក្នុងប្រព័ន្ធដូចជា អ្នកបង្កើត/កែប្រែប្រតិបត្តិការ និងអ្នកអនុម័តលើប្រតិបត្តិការ។
- អ្នកបញ្ចូលប្រតិបត្តិការ៖ មានតួនាទីបញ្ចូលប្រតិបត្តិការ កែតម្រូវ ការបដិសេធឬលុប ផ្ទៀងផ្ទាត់ព័ត៌មាន ត្រួតពិនិត្យថវិកា ពិនិត្យរបាយការណ៍ ការដាក់បញ្ជូនប្រតិបត្តិការទៅអ្នកអនុម័ត ដើម្បីសម្រេចលើប្រតិបត្តិការនោះ។
- អ្នកអនុម័តប្រតិបត្តិការ៖ មានតួនាទីការក្នុងការត្រួតពិនិត្យ និងផ្ទៀងផ្ទាត់ពីភាពត្រឹមត្រូវនៃប្រតិបត្តិការ ដើម្បីធ្វើការសម្រេចក្នុងការអនុម័តលើប្រតិបត្តិការ។ ហើយ អ្នកអនុម័តលើមុខងារការទិញក៏អាចពិនិត្យមើលឬទាញយករបាយការណ៍ពីក្នុងប្រព័ន្ធបានផងដែរ។
លក្ខណៈពិសេសនៃ មុខងារទិញ នៅក្នុងប្រព័ន្ធ FMIS រួមមាន៖
- អ្នកប្រើប្រាស់អាចធ្វើការទាញទិន្នន័យនូវព័ត៌មានមុខទំនិញពីទម្រង់ឯកសារ Excel ចូលក្នុងប្រព័ន្ធបាន និងមានភាពរហ័ស។
- ត្រួតពិនិត្យថវិកាដោយស្វ័យប្រវត្តិនៅក្នុងប្រពន័្ធ ដើម្បីធានាថាការស្នើសុំចំណាយមានថវិកាគ្រប់គ្រាន់មិនលើសពីពិដានថវិកា ដែលផ្តល់ភាពងាយស្រួល និងចំណេញពេលវេលាដល់អ្នកប្រើប្រាស់ផងដែរ។
- បោះពុម្ពឯកសារធានាចំណាយ ឯកសារការបញ្ជាទិញ ឯកសារបង្កាន់ដៃប្រគល់ទទួលទំនិញ ឬសេវា ព្រមទាំងការទាញយកនូវរបាយការណ៍ដូចជា របាយការណ៍បូកសរុបនៃសំណើសុំ និងរបាយការណ៍ការបញ្ជាទិញចេញពីប្រព័ន្ធជាដើម។