ដើម្បីឱ្យមានភាពស័ក្កិសិទ្ធិក្នុងការគ្រប់គ្រង និងអភិបាលកិច្ចគម្រោង ហើយឈានឆ្ពោះទៅដល់គោលដៅចុងក្រោយ ដែលជាការអនុវត្តគម្រោង FMIS ប្រកបដោយភាពជោគជ័យនោះ រចនាសម័្ពន្ធគម្រោង FMIS ត្រូវបានបែងចែកជាខ្សែបន្ទាត់ការងារ ដោយបង្កើតឡើងដើម្បីឱ្យត្រូវតាមតម្រូវការនៃការគ្រប់គ្រងគម្រោង FMIS។
ការរៀបរាប់លម្អិតរបស់ខែ្សបន្ទាត់ការងារនីមួយៗមានដូចខាងក្រោម៖
១. ការិយាល័យគ្រប់គ្រងគម្រោង (Project Management Office)
ក្នុងក្របខណ្ឌគម្រោង FMIS ខ្សែបន្ទាត់ការងារនេះដើរតួសំខាន់បំផុត ក្នុងការដឹកនាំ និងគ្រប់គ្រងខ្សែបន្ទាត់ការងារដទៃទៀតនៅក្នុងគម្រោងទាំងមូល ។
ការងារសង្ខេបនៃខ្សែបន្ទាត់ការងារគ្រប់គ្រងគម្រោងនោះ គឺ រៀបចំផែនការ គ្រប់គ្រង ត្រួតពិនិត្យវឌ្ឍនភាពគម្រោង និងដោះស្រាយនូវរាល់ហានិភ័យពាក់ព័ន្ធ វិសាលភាព បញ្ហា គម្លាត ព្រមទាំងបង្កើនការយកចិត្តទុកដាក់ឱ្យបានម៉ត់ចត់ក្នុងកំឡុងពេលអនុវត្តគម្រោង ដែលមានដូចជា៖
- ជួយជ្រោមជ្រែង និងធានាឱ្យបាននូវឆន្ទៈរបស់ថ្នាក់ដឹកនាំជាន់ខ្ពស់នៃក្រសួងសេដ្ឋកិច្ច និង ហរិញ្ញវត្ថុចំពោះគម្រោង FMIS
- បង្កើតផែនការគម្រោងនិងថវិកា
- ទទួលខុសត្រូលើស្ថានភាព និងវឌ្ឍនភាពគម្រោង
- ត្រួតពិនិត្យការផ្លាស់ប្តូរនៃគម្រោងពាក់ព័ន្ធនឹងដំណោះស្រាយ និងយុទ្ធសាស្រ្ត
- ទទួលខុសត្រូវលើការបញ្ចប់គម្រោងប្រកបដោយភាពជោគជ័យតាមកាលវិភាគ ថវិកា វិសាលភាព និងគុណភាពនៃគម្រោង ដែលជាភារកិច្ចដ៏ចម្បងត្រូវបានអនុវត្តដោយខ្សែបន្ទាត់ការងារនេះ ។
សម្រាប់ព័ត៌មានលម្អិត សូមចូលទៅកាន់ឯកសារភ្ជាប់ (links)- Roles and Major Responsibilities of FMIS Organization
២. ខ្សែបន្ទាត់ការងារសម្រាប់នីតិវិធីអនុវត្តការងារ
ខ្សែបន្ទាត់ការងារសម្រាប់នីតិវិធីអនុវត្តការងារ គឺទទួលខុសត្រូវលើការវិភាគនីតិវិធីអនុវត្តការងារ ការរៀបចំរាល់ឯកសារដែលពាក់ព័ន្ធនឹងនីតិវិធីអនុវត្តការងារ ការរៀបចំអភិវឌ្ឍ និងដំឡើងប្រព័ន្ធ FMIS ។
សម្រាប់ព័ត៌មានលម្អិត សូមចូលទៅកាន់ឯកសារភ្ជាប់ (links)- Roles and Major Responsibilities of FMIS Organization
៣. ខ្សែបន្ទាត់ការងារសម្រាប់ការគ្រប់គ្រងការផ្លាស់ប្តូរ
ខ្សែបន្ទាត់ការងារនេះ គឺទទួលខុសត្រូវលើការធ្វើផែនការ ការគ្រប់គ្រង និង ការរៀបចំអនុវត្តរាល់សកម្មភាពពាក់ព័ន្ធនឹងការគ្រប់គ្រងការផ្លាស់ប្តូរ ដូចជា៖
- អភិវឌ្ឍនិងអនុវត្តផែនការគ្រប់គ្រងការផ្លាស់ប្តូរ និងផែនការទំនាក់ទំនងផ្សព្វផ្សាយ
- គ្រប់គ្រង និងអនុវត្តរាល់សកម្មភាពក្នុងការទំនាក់ទំនងផ្សព្វផ្សាយ សម្រាប់ក្រុមការងារគម្រោង មន្ត្រីប្រើប្រាស់ប្រព័ន្ធ អ្នកពាក់ព័ន្ធ និង សមាជិកគ្រប់គ្រងគម្រោងទាំងឡាយ
- យល់ដឹងឱ្យបានច្បាស់ពីរចនាសម្ព័ន្ធស្ថាប័នបច្ចុប្បន្ន និងអនាគតដែលនឹងត្រូវអនុវត្តតាមប្រព័ន្ធនាពេលអនាគត ។
បន្ទាប់មកត្រូវយល់ដឹងឱ្យបានច្បាស់ពីផលប៉ះពាល់ នៃគម្រោង FMIS ទៅលើនីតិវិធីអនុវត្តការងារ ឬរបៀបអនុវត្តការងារ លើតួនាទីដែលត្រូវប៉ះពាល់ លើជំនាញឬចំណេះដឹងរបស់មន្រ្តីប្រើប្រាស់ និង លើការផ្លាស់ប្តូរបន្ទុកការងារ ដើម្បីបង្កើតនូវឯកសារទំនាក់ទំនងផ្សព្វផ្សាយ ក្នុងគោលបំណងពង្រឹងដល់ការត្រៀមរួចជាស្រេចរបស់មន្រ្តីក្នុងការផ្លាស់ប្តូរ ។
សម្រាប់ព័ត៌មានលម្អិត សូមចូលទៅកាន់ឯកសារភ្ជាប់ (links)- Roles and Major Responsibilities of FMIS Organization
៤. ការអភិវឌ្ឍ និងការគ្រប់គ្រងហេដ្ឋារចនាសម្ព័ន្ធ
ខ្សែបន្តាត់ការងារសម្រាប់ផ្នែកបច្ចេកទេស គឺទទួលខុសត្រូវលើការអនុវត្តផ្នែកហេដ្ឋារចនាសម្ព័ន្ធ និងការអភិវឌ្ឍហេដ្ឋារចនាសម្ព័ន្ធរបស់ប្រព័ន្ធ ដែលមានដូចជា ការរៀបចំស្ថាបត្យកម្មប្រព័ន្ធ ការបង្កើតនូវមជ្ឈដ្ឋានអភិវឌ្ឍការងារ ការដំឡើងបណ្តាញសម្រាប់មជ្ឈមណ្ឌលទិន្នន័យនិងមជ្ឈមណ្ឌលសង្គ្រោះទិន្នន័យ ការបង្កើតបណ្តាញកុំព្យូទ័រដែលមានលក្ខណៈស្តង់ដា និងបង្កើតនូវមជ្ឈដ្ឋានការងារផ្សេងៗទៀត។
សម្រាប់ព័ត៌មានលម្អិត សូមចូលទៅកាន់ឯកសារភ្ជាប់ (links)- Roles and Major Responsibilities of FMIS Organization
៥. ការបណ្តុះបណ្តាល
ខ្សែបន្ទាត់ការងារនេះ គឺទទួលខុសត្រូវលើការធ្វើផែនការ ការគ្រប់គ្រង និងការអនុវត្តនូវរាល់សកម្មភាពពាក់ព័ន្ធនឹងការបណ្តុះបណ្តាល ដូចជា៖
- កំណត់ពីតម្រូវការការបណ្តុះបណ្តាលសម្រាប់ការអនុវត្តគម្រោង
- កំណត់មន្ត្រីប្រើប្រាស់ដែលត្រូវបណ្តុះបណ្តាល និងសម្របសម្រួលលើកាលវិភាគបណ្តុះបណ្តាលមន្រ្តីប្រើប្រាស់ចុងក្រោយ
- បង្កើត និងអនុវត្តសកម្មភាពបណ្តុះបណ្តាលទៅតាមផែនការបណ្តុះបណ្តាល ក្នុងគោលបំណងដើម្បីធានាឱ្យបានថា ផែនការបណ្តុះបណ្តាលរបស់គម្រោងត្រូវបានបង្កើតឡើង ហើយស្របទៅតាមផែនការរបស់គម្រោង ។
សម្រាប់ព័ត៌មានលម្អិត សូមចូលទៅកាន់ឯកសារភ្ជាប់ (links)- Roles and Major Responsibilities of FMIS Organization
៦. ការអនុវត្ត និងដាក់ប្រព័ន្ធឱ្យប្រើប្រាស់ (IR) និង ការទ្រទ្រង់ និងថែទាំ (SM)៖
ខ្សែបន្ទាត់ការងារនេះនឹងត្រូវចាប់ផ្តើមសកម្មភាពក្នុងកំឡុងពេលនៃដំណាក់កាលប្រើប្រាស់ប្រព័ន្ធជាផ្លូវការ និងដំណាក់កាលទ្រទ្រង់ និងថែទាំ ។ ការទទួលខុសត្រូវនេះគឺដើម្បីទ្រទ្រង់ដល់ការប្រើប្រាស់ប្រព័ន្ធក្នុងកំឡុងពេលអនុវត្តន៍ (ដាក់ឱ្យប្រើប្រាស់នៅអគ្គនាយកដ្ឋានរតនាគារជាតិ និងអគ្គនាយកដ្ឋានគន្លឹះនៃក្រសួងសេដ្ឋកិច្ច និង ហិរញ្ញវត្ថុ) និងបន្តដាក់ប្រព័ន្ធឱ្យប្រើប្រាស់នៅតាមរតនាគាររាជធានី-ខេត្ត និងបន្ទាប់ពីបញ្ចប់គម្រោង ។ ជួយដល់មន្ត្រីប្រើប្រាស់នៅពេលដែលប្រព័ន្ធនាពេលអនាគតបានដាក់ឱ្យប្រើប្រាស់ និងធ្វើការថែទាំប្រព័ន្ឋ ដើម្បីជួយរក្សានូវដំណើរការរបស់ប្រព័ន្ធឱ្យមានស្ថេរភាពនិង ភាពរលូន ។