7
Feb, 2022
លេខាធិការដ្ឋានក្រុមការងារគ្រប់គ្រងគម្រោង FMIS រៀបចំប្រជុំស្តីពីលទ្ធផលការងារប្រចាំឆ្នាំ ២០២១ និង ទិសដៅការងារសម្រាប់ឆ្នាំ ២០២២
នាព្រឹកថ្ងៃ ចន្ទ ៦កើត ខែមាឃ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី ០៧ ខែកុម្ភៈ ឆ្នាំ ២០០២២ លេខាធិការដ្ឋានក្រុមការងារគ្រប់គ្រងគម្រោង FMIS បានរៀបចំកិច្ចប្រជុំស្តីពី “លទ្ធផលការងារប្រចាំឆ្នាំ ២០២១ និង ទិសដៅការងារសម្រាប់ឆ្នាំ ២០២២” ក្រោមការដឹកនាំដោយឯកឧត្តម មន្ត ប្រាថ្នា អគ្គលេខាធិការរង នៃអគ្គលេខាធិការដ្ឋានក្រសួងសេដ្ឋកិច្ចនិងហិរញ្ញវត្ថុ និងជាអនុប្រធានប្រចាំការក្រុមការងារគ្រប់គ្រងគម្រោង FMIS ដើម្បីបង្ហាញពីវឌ្ឍនភាពនៃការអនុវត្តការងារក្នុងក្របខណ្ឌគម្រោង FMIS និងបញ្ហាប្រឈម ព្រមទាំងដំណោះស្រាយ ក្នុងទិសដៅធ្វើឱ្យមានភាពប្រសើរឡើងនៃការអនុវត្តគម្រោង FMIS ឈានឆ្ពោះទៅរកការសម្រេចបានតាមគោលដៅ ពោលគឺការដាក់ឱ្យអនុវត្តប្រព័ន្ធ FMIS ឱ្យប្រើប្រាស់ពេញលេញនៅគ្រប់បណ្តាក្រសួង-ស្ថាប័ន អង្គភាពថវិកាដែលជាអណាប័កផ្ទេរសិទ្ធទាំងនៅគ្រប់ថ្នាក់ជាតិ និងថ្នាក់ក្រោមជាតិ ។
តាមរយៈការអនុវត្តគម្រោង FMIS នៅក្នុងឆ្នាំ ២០២១ កន្លងមក ក្រុមការងារសម្រេចបានសមិទ្ធផលនៃវឌ្ឍនភាពជាច្រើនរួមមាន៖
-បានពង្រីកដាក់ឱ្យប្រើប្រាស់ប្រព័ន្ធ FMIS ផ្លូវការនៅ ABEs ចំនួន២រួមមាន៖ លេខាធិការដ្ឋានក្រុមប្រឹក្សាជាតិគាំពារសង្គម និង ឧត្តមក្រុមប្រឹក្សាសេដ្ឋកិច្ចជាតិ
-បានពង្រីកដាក់ឱ្យប្រើប្រាស់សាកល្បងមុខងារ BP និង PR នៅក្រសួងសេដ្ឋកិច្ចនិងហិរញ្ញវត្ថុ ក្រសួងកិច្ចការនារី និង ក្រសួងព័ត៌មាន
-បានពង្រីកការធ្វើសន្ធានប្រព័ន្ធ FMIS ជាមួយប្រព័ន្ធបៀវត្សមន្ត្រីរាជការ (ដំណើរការជាផ្លូវការ) និង ប្រព័ន្ធ EFMS (សិក្សាលទ្ធភាព)
-បានពង្រីកការដាក់ដំឡើងប្រព័ន្ធ FMIS នៅការដ្ឋានបន្ថែមថ្មីរួមមាន៖ រដ្ឋបាលរាជធានី-ខេត្តទាំង២៥ និង អង្គភាពថវិកាអាណាប័កផ្ទេរសិទ្ធិបន្ថែមថ្មីចំនួន១០
-បានពង្រីកការដាក់ដំឡើងមុខងារ BP និង PR នៅការដ្ឋានបន្ថែមថ្មីបានចំនួន ១១ ក្រសួង (BP) និង ៣៤ ក្រសួង-ស្ថាប័ន (PR)
-បានពង្រីកការធ្វើសន្ធានកម្មរបាយការណ៍ធនាគារជាមួយប្រព័ន្ធ FMIS ក្នុងនោះមាន ធនាគារ ABA FTB និង CHIPMONG BANK
-បានពង្រឹងការអនុវត្តនីតិវិធីថ្មីលើការទូទាត់ចំណាយដែលមានហានិភ័យក្នុងកម្រិតទី១នៅ កសហវ និង ២៧ ក្រសួង-ស្ថាប័ន និង ហានិភ័យក្នុងកម្រិតទី២ នៅកសហវ
-បានពង្រឹងកម្មវិធីកញ្ចក់ថវិកាជំនាន់ទី១ និងជំនាន់ទី២
-បានពង្រឹងគុណភាព និង កែលម្អប្រព័ន្ធតាមដាន និងវាយតម្លៃលើការអនុវត្តការបញ្ចូលព័ត៌មានចំណាត់ថ្នាក់ថវិកា និង គុណភាពរបាយការណ៍ចំណាយថវិកាតាមចំណាត់ថ្នាក់ថវិកាទាំង៧
-បានពង្រឹងបន្តគាំទ្រ និង បំប៉នការដ្ឋានដែលកំពុងប្រើប្រាស់ប្រព័ន្ធ FMIS ដែលមានដូចជា៖ ការលើកទឹកចិត្តដល់អ្នកប្រើប្រាស់ប្រព័ន្ធ FMIS គំរូ, ការបណ្តុះបណ្តាលបំប៉នគន្លឹះថ្មីបន្ថែម និង ការបន្តគាំទ្រ និង ដោះស្រាយបញ្ហា
-បានពង្រឹងការអភវឌ្ឍបន្ថែមនិងគាំទ្រការប្រើប្រាស់មុខងារ BP និង PR រួមមាន៖ បន្តជំរុញ គាំទ្រការប្រើប្រាស់ និង បង្ហាត់បង្ហាញបន្ថែម, អភិវឌ្ឍរបាយការណ៍បន្ថែម និង ការបកប្រែភាសា និង កែលម្អ និងអភិវឌ្ឍបន្ថែមនៅក្នុងប្រព័ន្ធ
-បានពង្រឹងសុវត្ថិភាព និងសមត្ថភាពប្រព័ន្ធ ដោយទទួលបានការប្រឹក្សា និងត្រៀមក្នុងការចាប់យក ISO 27001 និង រៀបចំសម្រាប់ការពង្រឹងសមត្ថភាព និង សុវត្ថិភាពមជ្ឍមណ្ឌលទិន្នន័យ ។
ដោយឡែក សម្រាប់ការអនុវត្តផែនការបន្តក្នុងឆ្នាំ ២០២២ របស់លេខាធិការដ្ឋានក្រុមការងារគ្រប់គ្រងគម្រោង FMIS មានដូចជា៖
-ការពង្រីកដាក់ឱ្យប្រើប្រាស់ប្រព័ន្ធ FMIS ផ្លូវការនៅ រដ្ឋបាលរាជធានី-ខេត្តទាំង ២៥ និង ABEs ចំនួន១០
-ការពង្រីកដាក់ឱ្យប្រើប្រាស់សាកល្បងមុខងារ BP និង PR នៅ ១១ក្រសួង (BP) និង ៣៤ ក្រសួង-ស្ថាប័ន (PR)
-ការពង្រីកការធ្វើសន្ធានប្រព័ន្ធ FMIS ជាមួយប្រព័ន្ធ EFMS
-ការពង្រីកការដំឡើងប្រព័ន្ធ FMIS នៅការដ្ឋានបន្ថែមថ្មីរួមមាន ១៥ គ្រឹះស្ថានសាធារណៈរដ្ឋបាល និង ABEs បន្ថែមថ្មី
-ការពង្រីកការដាក់ដំឡើងមុខងារ BP និង PR នៅការដ្ឋានបន្ថែមថ្មីឱ្យបានចំនួន ១២ ក្រសួង (BP) និង មន្ទីរសេដ្ឋកិច្ចនិងហិរញ្ញវត្ថុទាំង២៥ (BP + PR)
-ការពង្រីកការធ្វើសន្ធានកម្មរបាយការណ៍ធនាគារនៃប្រព័ន្ធ FMIS ជាមួយប្រព័ន្ធធនាគារពាណិជ្ជយ៉ាងតិច ១ បន្ថែម
-ការពង្រឹងការអនុវត្តនីតិវិធីថ្មីលើការទូទាត់ចំណាយដែលមានហានិភ័យក្នុងកម្រិតទី១ និងទី២ នៅគ្រប់ក្រសួង-ស្ថាប័ន និង ហានិភ័យក្នុងកម្រិតទី៣ នៅ កសហវ
-ការពង្រឹងកម្មវិធីកញ្ចក់ថវិកាជំនាន់ទី២ ដោយគ្រោងនឹងដាក់ឱ្យដំណើារការជាផ្លូវការ និង ការពិនិត្យគុណភាព និង លទ្ធផលលើដំណើរការ
-ការពង្រឹងគុណភាព និង កែលម្អប្រព័ន្ធ FMIS តាមរយៈការធ្វើសន្ធានកម្មជាមួយនឹងប្រព័ន្ធខាងក្រៅដែលកំពុងដំណើរការ និងការពង្រឹងលើគុណភាពរបាយការណ៍ថវិកាតាមចំណាត់ថ្នាក់ថវិកាទាំង៧
-ការពង្រឹងបន្តគាំទ្រ និង បំប៉នការដ្ឋានដែលកំពុងប្រើប្រាស់ប្រព័ន្ធ FMIS តាមរយៈការលើកទឹកចិត្តដល់អ្នកប្រើប្រាស់ប្រព័ន្ធ FMIS គំរូ, ការបណ្តុះបណ្តាលបំប៉នគន្លឹះថ្មីបន្ថែម និង ការបន្តគាំទ្រ និង ដោះស្រាយបញ្ហា
-ការពង្រឹងការអភវឌ្ឍបន្ថែមនិងគាំទ្រការប្រើប្រាស់មុខងារ BP និង PR តាមរយៈការបន្តជំរុញ គាំទ្រការប្រើប្រាស់ និង បង្ហាត់បង្ហាញបន្ថែម, ការអភិវឌ្ឍរបាយការណ៍បន្ថែម និង ការកែលម្អ និងអភិវឌ្ឍបន្ថែមនៅក្នុងប្រព័ន្ធ
-ការពង្រឹងសុវត្ថិភាព និងសមត្ថភាពប្រព័ន្ធ តាមរយៈការទទួលបានវិញ្ញាបនបត្រ ISO/IEC: 27001 សម្រាប់មជ្ឈមណ្ឌលទិន្នន័យ និងការពង្រឹងសមត្ថភាព និង សុវត្ថិភាពមជ្ឍមណ្ឌលទិន្នន័យ ។
គួរជម្រាបជូនផងដែរថា តាមរយៈការប្រើប្រាស់ប្រព័ន្ធ FMIS ក្រសួង-ស្ថាប័ន អង្គភាព និងរដ្ឋបាលថ្នាក់ក្រោមជាតិ នឹងទទួលបានអត្ថប្រយោជន៍ជាច្រើនរួមមាន៖
១. ពង្រឹងគណនេយ្យភាពស្ថាប័ន និង ភាពជាម្ចាស់ក្នុងការគ្រប់គ្រងនិងការអនុវត្តថវិកា និង ហិរញ្ញវត្ថុ ។
២. កាត់បន្ថយការប្រើប្រាស់ធនធានក្នុងការរត់ការឯកសារទៅតាមនីតិវិធីនីមួយៗ ។
៣. តាមដានការអនុវត្តថវិកាបានកាន់តែមានប្រសិទ្ធភាពជាងមុន ។
៤. ទទួលបាននូវមូលដ្ឋានគ្រឹះមួយក្នុងការពិនិត្យមើលឡើងវិញនូវនីតិវិធីអនុវត្តការងារ ដែលនាំឱ្យមានការរាំងស្ទះ ឬពន្យារពេលដល់ការអនុវត្តថវិកា ។
៥. មានភាពងាយស្រួលក្នុងការគ្រប់គ្រង និង អនុវត្តថវិកាកម្មវិធី ដោយប្រើប្រាស់ចំណាត់ថ្នាក់ថវិកា ដែលមានស្រាប់នៅក្នុងប្រព័ន្ធ ។
៦. អាចតាមដាននូវលំហូរប្រតិបត្តិការ តាមរយៈលំហូរប្រតិបត្តិការក្នុងប្រព័ន្ធ FMIS នៅគ្រប់ដំណាក់កាល (រួមមានដំណាក់កាលអាណាប័ក ដំណាក់កាលអភិបាលហិរញ្ញវត្ថុ និង គណនេយ្យករសាធារណៈ ) ។
៧. ជាការពិតណាស់ នៅពេលដាក់ឱ្យអនុវត្តដំបូង នឹងមានការប្រើប្រាស់ឯកសារក្រដាសស្នាម ប៉ុន្តែជាបណ្តើរៗ ការប្រើប្រាស់ក្រដាសស្នាមនឹងត្រូវលុបបំបាត់បន្តិចម្តងៗ នៅពេលនីតិវិធីអនុវត្តការងារថ្មី តាមប្រព័ន្ធ FMIS ទាំងស្រុង ត្រូវបានដាក់ឱ្យអនុវត្ត ។
តាមចក្ខុវិស័យរបស់រាជរដ្ឋាភិបាល កម្ពុជា នឹងមានប្រព័ន្ធ FMIS ជាមូលដ្ឋានដ៏រឹងមាំក្នុងការធ្វើវិមជ្ឈការនៃការគ្រប់គ្រង និង អនុវត្តថវិកាជូនក្រសួង-ស្ថាប័ន និង តាមដានវាយតម្លៃលទ្ធផល និង សមិទ្ធកម្ម ប្រកបទៅដោយភាពជឿទុកចិត្ត ៕
