25
Dec, 2020
ក្រុមការងារFMIS បានរៀបចំវគ្គបណ្តុះបណ្តាលអំពី “មុខងាររៀបចំថវិកាផែនការសម្រាប់ជំហាន ១ក”
នាព្រឹកថ្ងៃ សុក្រ ១១ កើត ខែ បុស្ស ឆ្នាំ ជូត ទោស័ក ព.ស ២៥៦៤ ត្រូវនឹងថ្ងៃទី ២៥ ខែ ធ្នូ ឆ្នាំ ២០២០ លេខាធិការដ្ឋានក្រុមការងារគ្រប់គ្រងគម្រោង FMIS បានរៀបចំវគ្គបណ្តុះបណ្តាលអំពី “មុខងាររៀបចំថវិកាផែនការសម្រាប់ជំហាន ១ក” ជូនដល់មន្ត្រីបង្គោលនៃ អគ្គនាយកដ្ឋានថវិកាដែលជា អង្គភាពត្រូវប្រើប្រាស់លើមុខងារនេះមុនគេ។ វគ្គបណ្តុះបណ្តាលនេះរៀបចំឡើងនៅក្នុងបន្ទប់ប្រជុំនៃនាយកដ្ឋានបច្ចេកវិទ្យាព័ត៌មាននៃទីស្តីការក្រសួងសេដ្ឋកិច្ចនិងហិរញ្ញវត្ថុ។
វគ្គបណ្តុះបណ្តាលនេះផងដែរ បានផ្តល់ជូនសិក្ខាកាមឱ្យស្វែងយល់ពី ទិដ្ឋភាពទូទៅនៃមុខងាររៀបចំផែនការថវិកា, របៀបបញ្ចូលពិតានថវិកា, របៀបបញ្ចូលគម្រោងថវិកាចំណាយលម្អិត, ការត្រួតពិនិត្យថវិកា, ការត្រួតពិនិត្យថវិកានៅអគ្គនាយកដ្ឋានថវិកា, ការកែតម្រូវប្រតិបត្តិការ, និង របៀបការត្រួតពិនិត្យរបាយការណ៍ចរចារថវិកា ដើម្បីធានាបានថា សិក្ខាកាមទាំងអស់នឹងអាចអនុវត្តបានផ្ទាល់ដោយខ្លួនឯងនៅក្នុងប្រព័ន្ធ FMIS-BPS បន្ទាប់ពីបញ្ចប់វគ្គបណ្តុះបណ្តាល។
គួរបញ្ជាក់បន្ថែមទៀតថា ការរៀបចំមុខងាររៀបចំផែនការថវិកាត្រូវបានបែងចែកជា ៣ ជំហាន ដែលនៅក្នុងជំហានទី១នេះ លេខាធិការដ្ឋានក្រុមការងារគ្រប់គ្រងគម្រោង FMIS បានសហការជាមួយក្រុមហ៊ុនផ្គត់ផ្គង់ និង អគ្គនាយកដ្ឋានពាក់ព័ន្ធសម្រេចបាននូវលទ្ធផលរួមមាន៖
១. បានរៀបចំរួចរាល់នូវសេចក្តីព្រាងឯកសារនីតិវិធីអនុវត្តការងារសម្រាប់មុខងាររៀបចំផែនការថវិកា
២.បានរៀបចំរួចរាល់នូវនិតិវិធីអនុវត្តការងារតាមប្រព័ន្ធរៀបចំផែនការថវិកាផ្នែកថវិកាចរន្ត
២.បានរៀបចំរួចរាល់នូវឯកសារតម្រូវការអ្នកប្រើប្រាស់ និង ឯកសារតម្រូវការបច្ចេកទេស
៣.បានអភិវឌ្ឍផ្នែកបច្ចេកទេសប្រព័ន្ធរួចរាល់សម្រាប់ជំហានទី១ ស្តីពីការរៀបចំផែនការថវិកាប្រចាំឆ្នាំ
៤.បានបញ្ចប់ការធ្វើតេស្តសាកល្បងលើប្រព័ន្ធរៀបចំផែនការថវិកាជំហានទី១ ដោយមន្ត្រីនៃអគ្គនាយកដ្ឋានថវិកា។
