29
Nov, 2019
ក្រុមការងារគ្រប់គ្រងគម្រោង FMIS រៀបចំវិបស្សនាប្រចាំឆ្នាំ ដើម្បីពិនិត្យលើបញ្ហាប្រឈម វឌ្ឍនភាព និង លទ្ធផល នៃការអនុវត្តគម្រោង FMIS
ក្នុងគោលបំណងត្រួតពិនិត្យលើបញ្ហាប្រឈម វឌ្ឍនភាព និង លទ្ធផល នៃការអនុវត្តគម្រោង FMIS សម្រាប់ឆ្នាំ ២០១៩ និង ទិសដៅបន្តសម្រាប់ឆ្នាំ ២០២០ លេខាធិការដ្ឋានក្រុមការងារគ្រប់គ្រងគម្រោង FMIS បានរៀបចំវិបស្សនាប្រចាំឆ្នាំ ចាប់ពីថ្ងៃទី ២៨ ខែវិច្ឆិកា ដល់ថ្ងៃទី ០១ ខែធ្នូ ឆ្នាំ ២០១៩ នៅខេត្តមណ្ឌលគិរី ។
មិនខុសពីឆ្នាំមុនៗដែរ នៅក្នុងកម្មវិធីនៃវិបស្សនាលើកនេះ លេខាធិការដ្ឋានក្រុមការងារ បានធ្វើបទបង្ហាញអំពីសមិទ្ធផលសម្រេចបាននៅក្នុងឆ្នាំ ២០១៩ សម្រាប់ការងាររបស់គម្រោង FMIS ជាពិសេសនោះគឺសមិទ្ធផលសម្រាប់ត្រីមាសទី ៣ ឆ្នាំ ២០១៩ ស្របតាមផែនការសកម្មភាពរួមដំណាក់កាលទី៣ (GDAP3)។ សមិទ្ធផលសំខាន់ៗ ដែលក្រុមការងារគ្រប់គ្រងគម្រោង FMIS សម្រេចបានសម្រាប់ត្រីមាសទី ៣ ឆ្នាំ ២០១៩ នេះ រួមមាន៖
ការងារពង្រីកការអនុវត្តគម្រោង FMIS ទៅក្រសួងស្ថាប័នដែលនៅសេសសល់ និងមុខងារថ្មី ២៖
- បានរៀបចំរួចរាល់នូវការបណ្តុះបណ្តាលអ្នកប្រើប្រាស់ប្រព័ន្ធ FMIS ចំនួន ៣៧២រូប មកពីក្រសួង-ស្ថាប័នចំនួន ១៧ សម្រាប់ត្រៀមប្រើប្រាស់ប្រព័ន្ធ FMIS ជាផ្លូវការនៅដើមឆ្នាំ ២០២០ខាងមុខ។
- សម្រេចបាននូវការដំឡើងហេដ្ឋារចនាសម្ព័ន្ធបច្ចេកវិទ្យាព័ត៌មាន ពាក់ព័ន្ធនឹងការតភ្ជាប់បណ្ដាញ Network (LAN), ការតភ្ជាប់បណ្ដាញអគ្គិសនី, ដំឡើងទូរ Rack និងការតភ្ជាប់ Leased Line ទៅមជ្ឈមណ្ឌលទិន្នន័យ នៅក្រសួងស្ថាប័ន ១៧ បន្ថែមថ្មី និង អង្គភាពថវិកាដែលជាអាណាប័កផ្ទេរសិទ្ធិពេញលេញមួយចំនួន,
- បានកែសម្រួល និងរៀបចំប្រព័ន្ធ FMIS រួចរាល់សម្រាប់ក្រសួងស្ថាប័ន ១៧ ថ្មី ឆ្លើយតបនឹងបញ្ជីឈ្មោះអ្នកប្រើប្រាស់ និងលំហូរការងារដែលបានផ្ដល់ជូនពីក្រសួងស្ថាប័ន,
- សម្រេចបាននូវការរៀបចំឯកសារតម្រូវការមុខងារសម្រាប់មុខងាររៀបចំផែនការថវិកា និងមុខងារលទ្ធកម្ម រួមទាំងរៀបចំសេចក្ដីព្រាងឯកសារដេញថ្លៃសម្រាប់មុខងារទាំងពីរនេះ ។
ការសិក្សានិងរៀបចំប្រព័ន្ធសន្ធានកម្មជាមួយប្រព័ន្ធថ្មីបន្ថែម៖
- សម្រេចបាននូវការទូទាត់តាម EFT (Electronic Fund Transfer) ពីប្រព័ន្ធ FMIS ទៅក្រុមហ៊ុនផ្គត់ផ្គង់ដែលមានគណនីនៅធនាគារពាណិជ្ជ និងដាក់អនុវត្តនៅអគ្គនាយកដ្ឋានរតនាគារជាតិសម្រាប់ការទូទាត់នៅថ្នាក់កណ្ដាល។ ក្រុមការងារនឹងបន្តសិក្សាជាមួយធនាគារពាណិជ្ជដៃគូ បន្ថែមទៀត ដើម្បីធ្វើការពង្រីកការអនុវត្តនៅថ្នាក់មូលដ្ឋាន ដែលនឹងគ្រោងអនុវត្តនៅឆ្នាំបន្តបន្ទាប់នៅរតនាគាររាជធានី ខេត្ត,
- សម្រេចបាននូវលទ្ធផលនៃការសិក្សាលទ្ធភាពបច្ចេកទេសក្នុងការសន្ធានកម្មទិន្នន័យរវាងប្រព័ន្ធ FMIS និងប្រព័ន្ធបៀវត្សមន្ត្រីរាជការ (Payroll) នៃក្រសួងមុខងារសាធារណៈ (ដោយត្រូវកែសម្រួលប្រព័ន្ធ Payroll មួយចំនួន មុននឹងធ្វើសន្ធានកម្មបាន)
- សម្រេចបាននូវការរៀបចំប្រព័ន្ធសន្ធានកម្មរវាងប្រព័ន្ធ FMIS និងប្រព័ន្ធ NRMIS រួចរាល់ ដោយកំពុងស្ថិតក្នុងដំណាក់ការធ្វើតេស្តដោយក្រុមការងារអគ្គនាយកដ្ឋានរតនាគារជាតិ,
- ការងារសន្ធានកម្មទិន្នន័យរវាងប្រព័ន្ធ FMIS និងប្រព័ន្ធពន្ធដារ បានសម្រេចប្រមាណ ៥០% លើផ្នែកបច្ចេកទេស ។ ទន្ទឹមនឹងនេះ នីតិវិធីរៀបចំសលាកបត្របង់ចំណូលថវិកាជាតិ ក៏ត្រូវបានពិភាក្សា និងគិតគូររៀបចំកែសម្រួលនីតិវិធីថ្មី ជាមួយអគ្គនាយកដ្ឋានរតនាគារជាតិ ក្នុងខណៈពេលដាក់ឱ្យដំណើរការសន្ធានកម្មជាផ្លូវការនៅពេលខាងមុខ ។
ការងារតម្រង់ទិស និងកែលម្អនីតិវិធីអនុវត្តការងារ (Business Process Streamline)៖
ក្រុមការងារសម្រេចបាននូវការសិក្សា និងរៀបចំឯកសារសំណើកែសម្រួល និងតម្រង់ទិសនីតិវិធីអនុវត្តការងារទូទាត់ចំណាយបៀវត្ស និងទូទាត់ចំណាយព្រមដែលមានហានិភ័យទាប ដោយបានគិតគូរផ្ដោតជាសំខាន់លើការអនុវត្តការងារតាមប្រព័ន្ធ FMIS ទាំងស្រុង តាមរយៈការកាត់បន្ថយជំហានការងារដោយដៃ (Manual Step) និងកាត់បន្ថយឯកសារជាក្រដាស ដោយនឹងស្នើសុំការសម្រេចពីថ្នាក់ដឹកនាំក្រសួងសេដ្ឋកិច្ចនិងហិរញ្ញវត្ថុ ក្នុងការអនុវត្តសាកល្បងនៅក្នុងក្រសួងសេដ្ឋកិច្ចនិងហិរញ្ញវត្ថុជាគំរូ នៅដើមឆ្នាំ ២០២០ មុននឹងឈានដល់ការជំរុញការអនុវត្តនៅក្រសួង-ស្ថាប័នផ្សេងៗទៀត ។
ការពង្រឹងការអនុវត្តប្រព័ន្ធ FMIS៖
- បានធ្វើការផ្សព្វផ្សាយគន្លឹះថ្មីពាក់ព័ន្ធនឹងប្រព័ន្ធ FMIS ជូនថ្នាក់ដឹកនាំ និងមន្ត្រីនៃក្រសួង-ស្ថាប័នចំនួន ១០ ដែលបានអនុវត្តប្រព័ន្ធ FMIS ក្នុងឆ្នាំ ២០១៨ រួមមាន ការប្រើប្រាស់ប្រព័ន្ធជំនួយគាំទ្រ PK-The Helper ថ្មី, ការទាញផលប្រយោជន៍ពី FMIS បម្រើការងារគ្រប់គ្រងហិរញ្ញវត្ថុប្រចាំថ្ងៃ ជាពិសេសពាក់ព័ន្ធនឹងការប្រើប្រាស់ទិន្នន័យ និងរបាយការណ៍ ជាដើម,
- ឧបករណ៍សម្ភារបច្ចេកវិទ្យាព័ត៌មាន និង មិនមែនបច្ចេកវិទ្យាព័ត៌មាន របស់គម្រោង FMIS រួមមាន៖ កុំព្យូទ័រ, ម៉ាស៊ីនព្រីន, ម៉ាស៊ីនស្គេន, ឧបករណ៍បណ្តាញតភ្ជាប់ ។ល។ល នៅតាមក្រសួងស្ថាប័ន, អង្គភាពថវិកាដែលជាអាណាប័កផ្ទេរសិទ្ធិពេញលេញ, អគ្គនាយកដ្ឋាន-នាយកដ្ឋានពាក់ព័ន្ធ និង មន្ទីរសេដ្ឋកិច្ចនិងហិរញ្ញវត្ថុទាំង ២៥ រាជធានី-ខេត្ត ត្រូវបានចុះត្រួតពិនិត្យ ជួសជុល និង ថែទាំ ដើម្បីធានាបានឧបករណ៍សម្ភារទាំងអស់ដំណើរការបានល្អ និង ប្រើប្រាស់បានយូរអង្វែង,
- របាយការណ៍សម្រាប់ភ្ជាប់ក្នុងច្បាប់ទូទាត់ជារួមក្រុមការងារសម្រេចបានប្រមាណ ៧០% ដោយកំពុងធ្វើកិច្ចការងារនេះយ៉ាងសកម្មជាមួយអគ្គនាយកដ្ឋានរតនាគារជាតិ,
- ការងារផ្សព្វផ្សាយ រួមមាន ព័ត៌មាន វីដេអូ និង ព្រឹត្តិបត្រព័ត៌មាន អំពីគម្រោង និង ប្រព័ន្ធ FMIS ត្រូវបានរៀបចំ និង ធ្វើការផ្សព្វផ្សាយទូលំទូលាយទៅគ្រប់អ្នកពាក់ព័ន្ធ តាមរយៈគេហទំព័រ បណ្តាញសង្គម ។ល។
