21
May, 2014
ការទទួលជួបគណៈប្រតិភូរបស់ប្រទេស Madagascar ដោយក្រុមការងារ FMWG
កាលពីថ្ងៃទី២០ ខែឧសភា ឆ្នាំ២០១៤ នៅទីស្ដីការក្រសួងសេដ្ឋកិច្ចនិងហិរញ្ញវត្ថុ ក្រុមការងារគ្រប់គ្រងគម្រោងប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ (FMIS) របស់កម្ពុជា បានទទួលជួបគណៈប្រតិភូរបស់ប្រទេស Madagascar ដើម្បីចែករម្លែកបទពិសោធន៍ពាក់ព័ន្ធនឹងការអនុវត្តគម្រោង FMIS របស់ខ្លួន។
នៅក្នុងកិច្ចប្រជុំនោះ គណៈប្រតិភូរបស់ប្រទេស Madagascar បានធ្វើបទបង្ហាញអំពីប្រព័ន្ធ FMIS របស់ខ្លួន ដែលមានឈ្មោះថា SIGFP (Systeme Integre de Gestion des Finances Publiques – An Integrated System of Public Finance Management) ដោយបានចាប់ផ្ដើមគម្រោងតាំងពីឆ្នាំ ១៩៩៧ មកម្លេះ និងបានដាក់ឱ្យប្រើប្រាស់ប្រព័ន្ធនេះនៅដំណាក់កាលដំបូងក្នុងឆ្នាំ ២០០២ ។ ប្រព័ន្ធ FMIS របស់ Madagascar គឺជាប្រព័ន្ធដែលបង្កើតឡើងដោយក្រុមអ្នកព័ត៌មានវិទ្យាក្នុងស្រុក (In-house Development System) មិនមែនជាប្រព័ន្ធដែលមានលក្ខណៈស្តង់ដារអន្តរជាតិ (COTS – Commercial off-the-shelf)ឡើយ ហើយជាប្រព័ន្ធដែលមិនមានលក្ខណៈសមាហរណកម្មទិន្នន័យពេញលេញនោះទេ គឺប្រើប្រាស់ប្រព័ន្ធដាច់ដោយឡែកៗពីគ្នាពីនាយកដ្ឋានមួយទៅនាយកដ្ឋានមួយទៀត ។ ទាំងនេះ ជាហេតុផលដែលធ្វើឱ្យប្រទេសនេះ កំពុងសម្លឹងរកមើលប្រព័ន្ធថ្មីមួយដែលមានលក្ខណៈសមាហរណកម្មទិន្នន័យហិរញ្ញវត្ថុសាធារណៈពេញលេញក្នុងពេលឆាប់ៗនេះ។
ក្រុមការងារគ្រប់គ្រងគម្រោង FMIS របស់កម្ពុជាបានធ្វើបទបង្ហាញអំពីការអនុវត្តគម្រោង FMIS កន្លងមក ដោយបច្ចុប្បន្នស្ថិតនៅក្នុងដំណាក់កាលអនុវត្តកិច្ចសន្យាផ្គត់ផ្គង់ប្រព័ន្ធ FMIS ដោយប្រើប្រាស់ផលិតផល Oracle PeopleSoft Financial និងគ្រោងដាក់ឱ្យអនុវត្តប្រព័ន្ធ FMIS ក្នុងពាក់កណ្ដាលឆ្នាំ២០១៥ នៅថ្នាក់កណ្ដាល និងបន្តដាក់ឱ្យអនុវត្តនៅគ្រប់រតនាគាររាជធានី-ខេត្តរហូតដល់ត្រីមាសទី១ឆ្នាំ ២០១៦ ។ ក្រុមការងាររបស់កម្ពុជា បានផ្ដល់អនុសាសន៍ជាច្រើនពាក់ព័ន្ធនឹងការសម្លឹងរកប្រព័ន្ធថ្មីរបស់ Madagascar ដោយកម្ពុជាបានឆ្លងកាត់បទពិសោធន៍ក្នុងការដេញថ្លៃប្រព័ន្ធគ្រប់គ្រងហិរញ្ញវត្ថុសាធារណៈដែលមានលក្ខណៈអន្តរជាតិ (COTS) ដើម្បីដាក់អនុវត្តក្នុងការគ្រប់គ្រងហិរញ្ញវត្ថុសាធារណៈរបស់កម្ពុជា និងបានរៀបចំរបៀបនៃការគ្រប់គ្រងគម្រោង FMIS នេះប្រកបដោយភាពហ្មត់ចត់ដែលអាចត្រៀមលក្ខណៈទទួលខុសត្រូវដោយខ្លួនឯងបានបន្ទាប់ពីការចាកចេញទៅវិញរបស់ក្រុមហ៊ុនផ្គត់ផ្គង់នៅពេលចប់កិច្ចសន្យា ។ គណៈប្រតិភូរបស់ Madagascar បានលើកឡើងនូវសំណួរល្អៗជាច្រើនដើម្បីឱ្យកម្ពុជាជួយផ្ដល់អនុសាសន៍និងចែករម្លែកបទពិសោធន៍ សម្រាប់ពួកគេត្រៀមលក្ខណៈបោះជំហានតាមគំរូនេះនៅថ្ងៃអនាគត ។