+855 23 43 00 63

18

Apr, 2023

កិច្ចប្រជុំប្រចាំត្រីមាសទី១ឆ្នាំ២០២៣របស់ក្រុមការងារគ្រប់គ្រងគម្រោងFMISដើម្បីពិនិត្យមើលវឌ្ឍនភាពក្នុងការអនុវត្តគម្រោងFMISត្រីមាសទី១ឆ្នាំ២០២៣

ដោយ៖: | Tags: | មតិយោបល់: 0

នាព្រឹកថ្ងៃទី ១២ ខែ មេសា ឆ្នាំ ២០២៣ នៅទីស្តីការក្រសួងសេដ្ឋកិច្ចនិងហិរញ្ញវត្ថុ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋមន្រ្តីប្រតិភូអមនាយករដ្ឋមន្រ្តីរដ្ឋមន្រ្តី រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និង ជាប្រធានក្រុមការងារគ្រប់គ្រងគម្រោង FMIS បានដឹកនាំកិច្ចប្រជុំប្រចាំត្រីមាសទី ១ ឆ្នាំ ២០២៣ របស់ក្រុមការងារគ្រប់គ្រងគម្រោង FMIS ដើម្បីពិនិត្យមើលវឌ្ឍនភាពក្នុងការអនុវត្តគម្រោង FMIS ត្រីមាសទី ១ ឆ្នាំ ២០២៣ និង ពិភាក្សាលើការដាក់ឱ្យអនុវត្តនីតិវិធីអនុវត្តការងារតាមប្រព័ន្ធ FMIS ទាំងស្រុង ដែលមានការចូលរួមពីឯកឧត្តមអគ្គលេខាធិការនៃអគ្គលេខាធិការដ្ឋានក្រសួងសេដ្ឋកិច្ចនិងហិរញ្ញវត្ថុ, ឯកឧត្តមប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានថវិកា, ឯកឧត្តមប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានរតនាគារជាតិ, តំណាងអគ្គនាយកដ្ឋានរដ្ឋបាលហិរញ្ញវត្ថុថ្នាក់ក្រោមជាតិ, តំណាងអគ្គលេខាធិការដ្ឋាននៃគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ, តំណាងអគ្គាធិការដ្ឋាន, តំណាងអគ្គនាយកដ្ឋានលទ្ធកម្មសាធារណៈ, តំណាងអគ្គនាយកដ្ឋានសហប្រតិបត្តិការនិងគ្រប់គ្រងបំណុល, តំណាងអគ្គនាយកដ្ឋានសវនកម្មផ្ទៃក្នុង, តំណាងវិទ្យាស្ថានសេដ្ឋកិច្ចនិងហិរញ្ញវត្ថុ និង ថ្នាក់ដឹកនាំនិងក្រុមការងារលេខាធិការដ្ឋានក្រុមការងារគ្រប់គ្រងគម្រោង FMIS ។
មានប្រសាសន៍បើកអង្គប្រជុំឯកឧត្តមបណ្ឌិតសភាចារ្យ មានប្រសាសន៍ថ្លែងអំណរគុណដល់ក្រុមការងារដែលអញ្ជើញមកពីអគ្គនាយកដ្ឋានពាក់ព័ន្ធ និង លេខាធិការដ្ឋានក្រុមការងារគ្រប់គ្រងគម្រោង FMIS ដែលបានខិតខំចូលរួមបំពេញការងារប្រកបដោយបុរេសកម្ម យកចិត្តទុកដាក់ខ្ពស់ និង ចូលរួមយ៉ាងសកម្មភាពក្នុងការអនុវត្តគម្រោង FMIS ដែលសម្រេចបានលទ្ធផលល្អប្រសើរគួរឱ្យកត់សម្គាល់ដែលវឌ្ឍនភាពក្នុងត្រីមាសទី ១ ឆ្នាំ ២០២៣ នេះ សម្រេចបាន ៩៥% ។ ឯកឧត្តមបណ្ឌិតសភាចារ្យក៏មានប្រសាសន៍បន្ថែមថា ក្រៅពីពិនិត្យលើវឌ្ឍនភាព កិច្ចប្រជុំក៏នឹងពិភាក្សាពីការងារពាក់ព័ន្ធនឹងការអនុវត្តនីតិវិធីតាមប្រព័ន្ធ FMIS ទាំងស្រុង ទាំងនីតិវិធីអនុវត្តការងារ និង ការកំណត់ឯកសារភ្ជាប់ដែលទាមទារការចូលរួមពីអគ្គនាយកដ្ឋានពាក់ព័ន្ធដើម្បីផ្តល់លទ្ធភាពដល់ក្រុមការងាររៀបចំប្រព័ន្ធ FMIS ក្នុងការដាក់ឱ្យប្រើប្រាស់ជាផ្លូវការ ។
អង្គប្រជុំ បានពិភាក្សា និង យល់ស្របគ្នាពីអត្ថប្រយោជន៍ និង ភាពខុសគ្នារវាងការអនុវត្តការងារក្រៅប្រព័ន្ធ និង ក្នុងប្រព័ន្ធ FMIS ទាំងស្រុង ដែលជួយឱ្យការអនុវត្តការងារបានឆាប់រហ័ស មានឯកសារនិងភស្តុងតាងគ្រប់គ្រាន់ មានការកំណត់ពេលវេលាច្បាស់លាស់ និង ការទទួលខុសត្រូវខ្ពស់ ។ ក្នុងត្រីមាសទី ១ ឆ្នាំ ២០២៣ នេះ ក្រៅពីសម្រេចបានវឌ្ឍនភាពតាមផែនការសូចនាករដែលបានដាក់ចេញ ក្រុមការងារគ្រប់គ្រងគម្រោង FMIS ក៏សម្រេចបាននូវសមិទ្ធផលធំៗចំនួន ៣ បន្ថែមដែលលើសពីផែនការដែលបានកំណត់កាលពីដើមឆ្នាំដែលរួមមាន ៖ការដាក់ឱ្យប្រើប្រាស់ប្រព័ន្ធ FMIS Portal V1 ជំហានទី ២ ដល់រដ្ឋបាលក្រុង ស្រុក សង្កាត់ចំនួន ៥៤២ មុនកាលកំណត់, ការដាក់ឱ្យអនុវត្តឥណទានថវិកាក្នុងក្របខណ្ឌនៃការទូទាត់សេវាបំណុលតាមប្រព័ន្ធ FMIS ទាំងស្រុងសម្រាប់ជំពូក ៥០ និង ជំពូក ៦៦ និង ការដាក់ឱ្យអនុវត្តនីតិវិធីចំណាយថវិកាចរន្តតាមប្រព័ន្ធ FMIS ទាំងស្រុង នៅក្រសួងយុត្តិធម៌ដែលទើបមានការស្នើសុំបន្ថែមតាមក្រោយ ។
ជាចុងក្រោយឯកឧត្តមបណ្ឌិតសភាចារ្យលើកទឹកចិត្តដល់គ្រប់អគ្គនាយកដ្ឋានពាក់ព័ន្ធឱ្យបន្តសហការចូលរួមគ្នាដើម្បីឱ្យការអនុវត្តថវិកាកាន់តែមានប្រសិទ្ធភាពក្នុងប្រព័ន្ធ FMIS និង រៀបចំពង្រឹងការអនុវត្តថវិកាក្នុងក្រសួងសេដ្ឋកិច្ចនិងហិរញ្ញវត្ថុដើម្បីធ្វើជាគំរូដល់ក្រសួង-ស្ថាប័នដទៃ ។