28
Apr, 2014
សិក្ខាសាលាស្តីពី “ការស្វែងយល់ជាមុន និងភាពស៊ីជម្រៅពីប្រព័ន្ធ FMIS”
នៅថ្ងៃទី១៧ ដល់ថ្ងៃទី២៣ ខែ មេសា ឆ្នាំ២០១៤ ចាប់ពីម៉ោង ៨:៣០ នាទី ដល់ម៉ោង១១:៣០ នាទីព្រឹក និងពេលរសៀលចាប់ពីម៉ោង ២:០០ នាទី ដល់ម៉ោង៣:៣០ នាទី ក្រុមការងាររួមរបស់គម្រោង FMIS បានបើកសិក្ខាសាលាដំបូង ស្តីអំពី “ការស្វែងយល់ជាមុន និងស៊ីជម្រៅពីប្រព័ន្ធ FMIS (FMIS Induction and Envisioning Workshop)” រយៈពេល ៥ ថ្ងៃ នៅបន្ទប់ជាន់ទីមួយនៃអគារ “ខ” ទីស្តីការក្រសួងសេដ្ឋកិច្ចនិងហិរញ្ញវត្ថុ ដែលមានការចូលរួមពីក្រុមការងារគ្រប់គ្រងគម្រោង FMIS (FMWG) ។ ជាកិច្ចចាប់ផ្តើមនៃសិក្ខាសាលា លោក មន្ត ប្រាថ្នា ប្រធាននាយដ្ឋានព័ត៌មានវិទ្យា និងជាប្រធានគម្រោង FMIS បានថ្លែងសន្ទរកថាបើក ដោយបានបង្ហាញពីខ្លឹមសារសង្ខេប និងទិដ្ឋភាពទូទៅរបស់គម្រោង FMIS ព្រមទាំងបានបញ្ជាក់ពី ភាពចាំបាច់នៃការចូលរួមរបស់មន្រ្តីពាក់ព័ន្ធ ដើម្បីភាពជោគជ័យនៃគម្រោង ។ បន្ទាប់ពីនោះ សិក្ខាសាលាត្រូវបានធ្វើបទបង្ហាញដោយក្រុមការងាររបស់ក្រុមហ៊ុនផ្គត់ផ្គង់ FPT-LG CNS Joint Venture ដែលមាន Mr. Nguyen The Cuong, Ms. Nguyen Ngoc Ly, Mr. Manas Mohapatra និងMr. Harikanth Rachakonha ក្នុងគោលបំណងដើម្បី៖
១.បង្ហាញក្រុមការងារស្នូលរបស់គម្រោង FMIS ឱ្យយល់ច្បាស់ពីកាលវិភាគ និង ការប្រគល់ទទួល (FMIS Deliverable) សម្រាប់ការអនុវត្តគម្រោង FMIS ព្រមទាំងតួនាទី និងទំនួលខុសត្រូវរវាងក្រុមការងារ FMWG និង ក្រុមការងាររបស់ក្រុមហ៊ុនផ្គត់ផ្គង់ផងដែរ ដើម្បីឱ្យសិក្ខាកាម ដែលជាសមាជិកស្នូលបានដឹង និងយល់ពីការងារពាក់ព័ន្ធសំខាន់ៗ ។
២.បង្ហាញពីមុខងារនៃប្រព័ន្ធ FMIS ដូចជាគណនីត្រូវសង គណនីត្រូវទារ សៀវភៅធំ គ្រប់គ្រងសាច់ប្រាក់ បញ្ជាទិញ និងវិភាជន៍ថវិកា ដែលជាមុខងារសំខាន់សម្រាប់អនុវត្តការងារនៅក្នុងប្រព័ន្ធ FMIS ។ មុខងារទាំងនេះត្រូវបានធ្វើបទបង្ហាញលម្អិត រួមជាមួយនឹងផ្ទាំងកម្មវិធីអនុវត្តការងារនៅក្នុងប្រព័ន្ធ FMIS ជាជំនួយក្នុងការយល់ដឹងកាន់តែស៊ីជម្រៅ។
៣.ធ្វើឱ្យមន្រ្តីពាក់ព័ន្ធយល់ដឹងពីអត្ថប្រយោជន៍ការប្រើប្រាស់ប្រព័ន្ធ FMIS ដូចជាការធ្វើរបាយការណ៍ហិរញ្ញវត្ថុតាមការចង់បាន និងរបាយការណ៍ផ្សេងៗជាច្រើនទៀតដែលបង្កើតឡើងដោយប្រព័ន្ធ FMIS។
៤.ជួយឱ្យសិក្ខាកាមយល់ដឹងជាមុនពីពាក្យបច្ចេកទេសនៃកម្មវិធី PeopleSoft ដែលជាពាក្យគន្លឹះក្នុងការប្រើប្រាស់ផលិតផល Oracle Corporation’s PeopleSoft Financials ដូចជា Business Unit, Open Item Reconciliation, Chartfield, Tree manager ជាដើម ។
៥.ធ្វើឱ្យយល់ពីភាពចាំបាច់របស់ប្រព័ន្ធ FMIS និងជួយឱ្យសិក្ខាកាមមានគំនិតវិជ្ជមាន និងជឿជាក់ថាប្រព័ន្ធ FMIS របស់ប្រទេសកម្ពុជានឹងកើតឡើងយ៉ាងពិតប្រាកដនាពេលខាងមុខនេះ ។
ជាលទ្ធផល សិក្ខាសាលាបានប្រព្រឹត្តទៅ និងបញ្ចប់តាមពេលវេលាដែលបានគ្រោងទុក។ សិក្ខាកាមទាំងអស់បានយល់ច្បាស់ពីប្រព័ន្ធ FMIS ដែលជាប្រព័ន្ធមួយដ៏ប្រសើរក្នុងការអនុវត្តការងារប្រកបដោយភាពរហ័ស តម្លាភាព គណនេយ្យភាព ប្រសិទ្ធភាព និងភាពស័ក្តិសិទ្ធិ ។ សិក្ខាសាលានេះបានផ្តល់នូវចំណេះដឹង និងបទពិសោធន៍បន្ថែមជាច្រើន ពីក្រុមការងាររបស់ក្រុមហ៊ុនផ្គត់ផ្គង់ ដូចជាការលើកឡើងជាសំណួរពាក់ព័ន្ធទាំងឡាយ ដែលជាមូលដ្ឋានគ្រឹះសម្រាប់ការប្រើប្រាស់ប្រព័ន្ធ FMIS នាពេលខាងមុខ ។
ទាញយក៖ ឯកសារសិក្ខាសាលា