នាយកដ្ឋានបច្ចេកវិទ្យាព័ត៌មាននៃអគ្គលេខាធិការដ្ឋាន ក្រសួងសេដ្ឋកិច្ចនិងហិរញ្ញវត្ថុ ត្រូវបានបង្កើតឡើងពីថ្ងៃទី ២៣ ខែកញ្ញា ឆ្នាំ ២០០៨ ដោយមានតួនាទី និងភារកិច្ចធ្វើជាសេនាធិការរបស់ក្រសួងលើការងារ រៀបចំ បង្កើត និងពង្រឹងយុទ្ធសាស្ត្រ និងគោលនយោបាយបច្ចេកវិទ្យាព័ត៌មានវិទ្យា ដើម្បីទ្រទ្រង់ដល់ការកែទម្រង់ការគ្រប់គ្រងប្រព័ន្ធហិរញ្ញវត្ថុសាធារណៈឱ្យកាន់តែមានប្រសិទ្ធភាពនិងតម្លាភាព ។ នាយកដ្ឋានបច្ចេកវិទ្យាព័ត៌មានត្រូវអនុវត្តនិងគ្រប់គ្រងគម្រោង “ប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ” នៅគ្រប់ដំណាក់កាល ដើម្បីធានាឱ្យបាននូវគោលដៅនៃកម្មវិធីកែទម្រង់ហិរញ្ញវត្ថុសាធារណៈរបស់ក្រសួងនិងរាជរដ្ឋាភិបាល រួមទាំងការពង្រឹងការអនុវត្ដ ការបណ្ដុះបណ្ដាល និងការផ្សព្វផ្សាយស្ដីពីការគ្រប់គ្រងការផ្លាស់ប្ដូរ របស់គម្រោងប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ ដល់មន្ត្រីរបស់ក្រសួងសេដ្ឋកិច្ចនិងហិរញ្ញវត្ថុនៅគ្រប់ជាន់ថ្នាក់ និងគ្រប់បណ្ដាក្រសួងស្ថាប័ននៃរាជរដ្ឋាភិបាល។
នាយកដ្ឋានបច្ចេកវិទ្យាព័ត៌មានត្រូវ ទទួលខុសត្រូវក្នុងកិច្ចលទ្ធកម្មលើបណ្ដាញតភ្ជាប់ ម៉ាស៊ីនកុំព្យូទ័រ ឧបករណ៍ព័ត៌មានវិទ្យា និងកម្មវិធីកុំព្យូទ័រ ចំពោះគម្រោងដែលផ្ដល់ហិរញ្ញប្បទានដោយដៃគូអភិវឌ្ឍន៍ ជាពិសេសគម្រោងប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ និងចូលរួមកិច្ចលទ្ធកម្មលើសម្ភារៈបច្ចេកវិទ្យាព័ត៌មានវិទ្យាដែលប្រើប្រាស់ថវិកាជាតិជាមួយនឹងនាយកដ្ឋានពាក់ព័ន្ធនៅក្នុងក្រសួងសេដ្ឋកិច្ចនិងហិរញ្ញវត្ថុ។
នាយកដ្ឋានបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈមានតួនាទីគ្រប់គ្រង បង្កើតប្រព័ន្ធសុវត្ថិភាព ជួសជុល ថែរក្សាបណ្ដាញតភ្ជាប់ម៉ាស៊ីនកុំព្យូទ័រ ឧបករណ៍ព័ត៌មានវិទ្យានិងកម្មវិធីកុំព្យូទ័រនានា សម្រាប់នាយកដ្ឋានទាំងអស់នៃក្រសួងសេដ្ឋកិច្ចនិងហិរញ្ញវត្ថុ និងបំពេញការងារផ្សេងទៀតក្នុងវិស័យបច្ចេកវិទ្យាព័ត៌មានវិទ្យានិងទូរគមនាគមន៍តាមការណែនាំរបស់ថ្នាក់ដឹកនាំក្រសួងសេដ្ឋកិច្ចនិងហិរញ្ញវត្ថុ។
– អនុក្រឹត្យលេខ ៤៨៨ អនក្រ.បក ចុះថ្ងៃទី ១៦ ខែ តុលា ឆ្នាំ ២០១៣ ស្ដីពីការរៀបចំ និងការប្រព្រឹត្តទៅនៃក្រសួងសេដ្ឋកិច្ច និងហិរញ្ញវត្ថុ
–ប្រកាសលេខ ៩៥៩ សហវ.ប្រក ចុះថ្ងៃទី ២៨ ខែ សីហា ឆ្នាំ ២០១៥ ស្ដីពីការរៀបចំ និង ការប្រព្រឹត្តទៅនៃនាយកដ្ឋានព័ត៌មានវិទ្យា
–ប្រកាសលេខ ៦៧៥ សហវ.ប្រក ចុះថ្ងៃទី ៤ ខែ សីហា ឆ្នាំ ២០២០ ស្ដីពីការកែសម្រួល និងបំពេញបន្ថែម ការិយាល័យមួយចំនួន ក្រោមឱវាទនាយកដ្ឋានបច្ចេកវិទ្យាព័ត៌មាន
