26
Jul, 2022
វគ្គបណ្តុះបណ្តាលពង្រឹងសមត្ថភាពបន្ថែមស្តីពី “គន្លឹះថ្មីៗលើការប្រើប្រាស់ប្រព័ន្ធ FMIS និង ការអនុវត្តនីតិវិធីថ្មីតាមប្រព័ន្ធ FMIS ទាំងស្រុង” ជូនដល់អគ្គនាយកដ្ឋានរតនាគារជាតិ និង រតនាគារ រាជធានី-ខេត្តទាំង ២៥
នៅថ្ងៃទី ២៦ ដល់ថ្ងៃទី ២៨ ខែកក្កដា ឆ្នាំ ២០២២ លេខាធិការដ្ឋានក្រុមការងារគ្រប់គ្រងគម្រោង FMIS បានរៀបចំវគ្គបណ្តុះបណ្តាលពង្រឹងសមត្ថភាពបន្ថែមស្តីពី “គន្លឹះថ្មីៗលើការប្រើប្រាស់ប្រព័ន្ធ FMIS និង ការអនុវត្តនីតិវិធីថ្មីតាមប្រព័ន្ធ FMIS ទាំងស្រុង” តាមរយៈប្រព័ន្ធសន្និសីទវីដេអូ ដោយប្រើប្រាស់កម្មវិធី Zoom។ នៅក្នុងវគ្គបណ្តុះបណ្តាលនេះ មានការអញ្ជើញចូលរួមពីថ្នាក់ដឹកនាំ និង មន្ត្រីជំនាញ ដែលជាអ្នកប្រើប្រាស់ប្រព័ន្ធ FMIS នៅតាមរអគ្គនាយកដ្ឋានរតនាគារជាតិ និង រតនាគារ រាជធានី-ខេត្តទាំង ២៥ ប្រមាណជាង ១៩១រូប ។
លេខាធិការដ្ឋានក្រុមការងារគ្រប់គ្រងគម្រោង FMIS បានរៀបចំវគ្គបណ្តុះបណ្តាលនេះឡើងក្នុងគោលបំណង ពង្រឹងសមត្ថភាពបន្ថែម, ដោះស្រាយនូវបញ្ហាប្រឈមនានា, ពិភាក្សាលើនីតិវិធីចុះប្រតិបត្តិការចូលក្នុងប្រព័ន្ធ និង ណែនាំពីគោលការណ៍ថ្មីៗជូនមន្ត្រីជាអ្នកប្រើប្រាស់ប្រព័ន្ធ FMIS។
គួរបញ្ជាក់បន្ថែមផងដែរថា សម្រាប់មុខវិជ្ជាដែលក្រុមការងារគ្រប់គ្រងគម្រោង FMIS បានផ្តល់ជូនក្នុងវគ្គបណ្តុះបណ្តាលនេះរួមមាន៖ មុខងារវិភាជន៍ថវិកា, មុខងារទិញ, មុខងារគណនីត្រូវសង, មុខងារគណនីត្រូវទារ, មុខងារសៀវភៅធំ, មុខងារគ្រប់គ្រងសាច់ប្រាក់, ការគ្រប់គ្រងគណនី FMIS, គន្លឹះថ្មីៗ និង ដំណោះស្រាយផ្សេងៗក្នុងការប្រើប្រាស់ប្រព័ន្ធ FMIS, គោលការណ៍សុវត្ថិភាពនៃការប្រើប្រាស់ប្រព័ន្ធ FMIS សម្រាប់អ្នកប្រើប្រាស់ (End Use) និង ការប្រើប្រាស់ប្រព័ន្ធជំនួយគាំទ្រ PK-The Helper ។
