31
Dec, 2015
សិក្ខាសាលាស្តីពី “អ្នកគាំទ្រនាំមុខ និង បណ្តាញភ្នាក់ងារផ្លាស់ប្តូរ”
កាលពីថ្ងៃទី ២៥ ខែ ធ្នូ ឆ្នាំ ២០១៥ នៅសាលប្រជុំអាគារ “ខ ” ជាន់ផ្ទាល់ដី នៃទីស្តីការក្រសួងសេដ្ឋកិច្ច និង ហិរញ្ញវត្ថុ វេលាម៉ោង ៨:៣០ នាទីព្រឹក មានរៀបចំសិក្ខាសាលាស្តីអំពី “អ្នកគាំទ្រនាំមុខ និង បណ្តាញភ្នាក់ងារផ្លាស់ប្តូរ” ដោយមានការអញ្ជើញចូលរួមពីថ្នាក់ដឹកនាំនៃនាយកដ្ឋានព័ត៌មានវិទ្យា, មន្ត្រីតំណាងធនាគារពិភពលោក និង មន្រ្តីភ្នាក់ងារផ្លាស់ប្តូរដែលត្រូវបានជ្រើសរើស និង ចាត់តាំងដោយប្រធានរតនាគាររាជធានី-ខេត្ត ទាំង២៥ ។
អង្គសិក្ខាសាលានេះ មានគោលបំណងជាសំខាន់ដើម្បីបង្ហាញជូនមន្រ្តីភ្នាក់ងារផ្លាស់ប្តូរទាំងអស់ឱ្យយល់កាន់តែច្បាស់អំពីសារៈប្រយោជន៍, ប្រសិទ្ធភាព, គណនេយ្យភាព, តម្លាភាព, ស្វ័យប្រវត្តិកម្មនៃការផ្លាស់ប្តូរពីការងារដោយដៃទៅការងារអនុវត្តប្រព័ន្ធ FMIS, និង តួនាទីនិងភារ:កិច្ចសម្រាប់មន្ត្រីភ្នាក់ងារផ្លាស់ប្តូរទាំងអស់ដើម្បីគាំទ្រ និង ជំរុញការប្រើប្រាស់ប្រព័ន្ធ FMIS កំឡុងពេល និង ក្រោយពេលដាក់ឱ្យប្រើប្រាស់ប្រព័ន្ធនៅតាមរតនាគាររាជធានី-ខេត្ត នាពេលដ៏ខ្លីខាងមុខនេះ ។ លើសពីនេះទៅទៀត អង្គសិក្ខាសាលានេះមានគោលបំណងដើម្បីផ្តល់ឱកាសឱ្យមន្រ្តីចូលរួមទាំងអស់បានធ្វើការសាកសួរ ពិភាក្សា និង ផ្លាស់ប្តូរយោបល់ទៅលើបញ្ហាប្រឈមនានាដែលកំពុងជួបប្រទះដើម្បីស្វែងរក និង ផ្តល់ជាដំណោះស្រាយភ្លាមៗប្រសិនបើអាច ។
នៅក្នុងសិក្ខាសាលានេះ ក្រុមការងារ FMWG នៃនាយកដ្ឋានព័ត៌មានវិទ្យាបានធ្វើបទបង្ហាញពាក់ព័ន្ធនឹងចំណុចដូចក្រោម៖
១. ចក្ខុវិស័យ បេសកកម្ម និងគោលដៅ នៃគម្រោង FMIS
២. តារាងផែនការមេនៃប្រព័ន្ធ FMIS
៣. ពិនិត្យទៅលើលក្ខខ័ណ្ឌដែលប្រព័ន្ធ FMIS អាចជួយទ្រទ្រង់គម្រោង PFMRP ឱ្យសម្រេចគោលដៅ
៤. ទស្សន: និង ការយល់ឃើញរបស់មន្ត្រីភ្នាក់ងារផ្លាស់ប្តូរចំពោះប្រព័នុ្ធ FMIS
៥. សារ:ប្រយោជន៍នៃគម្រោង FMIS សម្រាប់រតនាគារ រាជធានី-ខេត្ត
៦. តារាងពេលវេលាសម្រាប់អនុវត្តប្រព័ន្ធ FMIS
៧. ផែនការបន្ទាប់សម្រាប់ភ្នាក់ងារការផ្លាស់ប្តូរ
៨. នីតិវិធីអនុវត្តស្តង់ដាររបស់មុខងារទាំងប្រាំ (សៀវភៅធំ, វិភាជន៍ថវិកា, គណនីត្រូវសង, គណនីត្រូវទារ និង គ្រប់គ្រងសាច់ប្រាក់ )
បន្ទាប់ពីបានស្តាប់ការធ្វើបទបង្ហាញស្តីអំពី “អ្នកគាំទ្រនាំមុខ និង បណ្តាញភ្នាក់ងារផ្លាស់ប្តូរ” រួចមក មន្រ្តីភ្នាក់ងារផ្លាស់ប្តូរបានយល់បន្ថែមកាន់តែច្បាស់អំពីតួនាទីនិងភារ:កិច្ចរបស់ខ្លួនក្នុងនាមជាចលករគន្លឹះក្នុងការជួយឱ្យការដាក់ប្រើប្រាស់ប្រព័ន្ធ FMIS ទទួលបានជោគជ័យប្រកបដោយផ្លែផ្កា ជាពិសេសពាក់ព័ន្ធនឹងការងារគ្រប់គ្រងការផ្លាស់ប្តូរ ។ បន្ថែមពីលើនេះទៀត ក្រុមការងារទទួលបន្ទុកមុខងារទាំងប្រាំ បានធ្វើបទបង្ហាញដោយសង្ខេបស្តីពីនីតិវិធីអនុវត្តស្តង់ដារមុខងារនីមួយៗ ព្រមជាមួយនឹងការបង្ហាញពីការប្រើប្រាស់ប្រព័ន្ធដោយផ្ទាល់ ជូនមន្ត្រីភ្នាក់ងារផ្លាស់ប្តូរដើម្បីឱ្យបានយល់អំពីលំហូរនៃនីតិវិធីអនុវត្តការងារដែលនឹងត្រូវអនុវត្ត និង ឃើញជាក់ស្តែងពីដំណើរការរបស់ប្រព័ន្ធ ។
ខាងក្រោមនេះគឺជាចំនុចសំខាន់ៗរបស់មុខងារទាំងប្រាំដែលក្រុមការងារបានលើកមកបង្ហាញជូនដល់ភ្នាក់ងារផ្លាស់ប្តូរ៖
១. មុខងារសៀវភៅធំ
- មុខងារនៃប្រព័ន្ធ FMIS
- ទិដ្ឋភាពរួមនៃប្រព័ន្ធ FMIS
- ការអនុវត្តថវិកា និង ការកត់ត្រាចំណូលចំណាយនៅថ្នាក់ក្រោមជាតិ
- មុខងារសៀវភៅធំ
- តួអង្គទាំង៥ក្នុងផ្នែកសៀវភៅ
- នីតិវិធីអនុវត្តការងារផ្នែកសៀវភៅធំ
២. មុខងារវិភាជន៍ថវិកា
- ទិដ្ឋភាពទូទៅផ្នែកវិភាជន៍ថវិកា
- លំហូរនីតិវិធីអនុវត្តការងារ ៖ ការបញ្ចូលថវិកាដើមឆ្នាំ, ការស្នើសុំឥណទានជាត្រីមាស (រាជធានី-ខេត្ត), ការបន្ថែមឥណទាន (រាជធានី-ខេត្ត),
ការបង្វែរឥណទាន (រាជធានី-ខេត្ត), ការស្នើសុំឥណទានជាត្រីមាស (ក្រុង-ស្រុក), ការបន្ថែមឥណទាន (ក្រុង-ស្រុក), បង្វែរឥណទាន (ក្រុង-ស្រុក), ការបង្វែរមូលនិធិជាត្រីមាស (ឃុំ-សង្កាត់), ការវិភាជន៍មូលនិធិ (ឃុំ-សង្កាត់) ។ - អត្ថប្រយោជន៍ដែលបានមកពីមុខងារវិភាជន៍ថវិកា
៣. មុខងារគណនីត្រូវសង
- ទិដ្ឋភាពរួមផ្នែកគណនីត្រូវសង
- លំហូរនីតិវិធីអនុវត្តការងារផ្នែកគណនីត្រូវសង (ថ្នាក់ក្រោមជាតិ )
- នីតិវិធីអនុវត្តការងារផ្នែកគណនីត្រូវសង
- បញ្ជីរបាយការណ៍ហិរញ្ញវត្ថុ
- អត្ថប្រយោជន៍ផ្នែកគណនីត្រូវសង
៤. មុខងារគណនីត្រូវទារ
- ទិដ្ខភាពទូទៅរបស់គណនីត្រូវទារ
- លំហូរនីតិវិធីអនុវត្តការងារ
– ការបង្កើតប្រាក់បញ្ញើ
– ការបង្កើតធាតុរងចាំ
– ការបង្វិលសងប្រាក់បញ្ញើ
– ការលុបធាតុ
– ការបង្កើតទិន្នានុប្បវត្តផ្ទាល់
– ការផ្ទេរប្រាក់បញ្ញើ - អត្ថប្រយោជន៍ទទួលបានពីការប្រើប្រាស់មុខងារគណនីត្រូវទារក្នុងប្រព័ន្ធ FMIS
៥. មុខងារគ្រប់គ្រងសាច់ប្រាក់
- ទិដ្ខភាពទូទៅរបស់មុខងារគ្រប់គ្រងសាច់ប្រាក់
- លំហូរនីតិវិធីអនុវត្តការងារ
– ការផ្ទេរសាច់ប្រាក់ពីគណនីធនាគារមួយរបស់រតនាគារ ទៅគណនីធនាគារមួយទៀតរបស់រតនាគារ
– ការបង្កើតសលាកប័ត្រចុះលេខនា
– ការបង្កើតសំណើត្រឡប់សលាកប័ត្រចុះលេខនា
– ការផ្ទៀងផ្ទាត់របាយការណ៍ធនាគារ
– ការផ្ទៀងផ្ទាត់សមតុល្យបញ្ជីគណនីជាមួយរបាយការណ៍ធនាគារ - អត្ថប្រយោជន៍របស់មុខងារគ្រប់គ្រងសាច់ប្រាក់
ជាកិច្ចបញ្ចប់នៃអង្គសិក្ខាសាលា មន្រ្តីភ្នាក់ងារផ្លាស់ប្តូរទាំងអស់បានយល់ដឹងកាន់តែច្បាស់ជាងមុនអំពីមុខងារនិងតួនាទីរបស់ខ្លួន ព្រមជាមួយនីតិវិធីអនុវត្តការងាររបស់មុខងារទាំងប្រាំនៅតាមរតនាគាររាជធានី-ខេត្តទៅតាមការរំពឹងទុក ។ មន្រ្តីទាំងអស់មានចំណាប់អារម្មណ៍ចំពោះប្រព័ន្ធ FMIS និងចង់ប្រើប្រាស់ប្រព័ន្ធឱ្យបានកាន់តែឆាប់ ព្រមទាំងបានលើកជាសំណួរល្អៗពាក់ព័ន្ធនឹងកិច្ចការប្រចាំថ្ងៃដែលកំពុងជួបឧបសគ្គ និង ស្នើសុំឱ្យមានការរៀបចំវគ្គបណ្តុះបណ្តាលផ្សេងៗទៀតដើម្បីពង្រឹងសមត្ថភាពទាំងមន្រ្តីភ្នាក់ងារផ្លាស់ប្តូរ និង មន្រ្តីដែលជាអ្នកប្រើប្រាស់ប្រព័ន្ធផ្ទាល់ ធ្វើយ៉ាងណាដើម្បីឱ្យការដាក់ប្រើប្រាស់ប្រព័ន្ធ FMIS ទទួលបានលទ្ធផលជោគជ័យយ៉ាងត្រចះត្រចង់ ។ ជាងនេះទៅទៀត វេទិកានេះបានបង្ហាញឱ្យឃើញកាន់តែច្បាស់អំពីការបេ្តជ្ញា ទាំងក្រុមការងារ និង ភ្នាក់ងារផ្លាស់ប្តូរនៃរតនាគាររាជធានី-ខេត្តនីមួយៗ ដើម្បីឈានឆ្ពោះទៅមុខ និងសម្រេចឱ្យបានការងារទាំងឡាយ និង រួមគ្នាជំនះនូវឧបសគ្គនៅពេលដែលប្រើប្រាស់ប្រព័ន្ធ FMIS នៅជំហានដំបូងនេះ ។
អង្គសិក្ខាសាលាត្រូវបានបញ្ចប់នៅវេលាម៉ោង ៥:០០ នាទី ល្ងាច ប្រកបដោយភាពជិតស្និទ្ធ និង សាមគ្គីភាព ក្នុងការឈានទៅរកភាពជោគជ័យនៃការអនុវត្តគម្រោង FMIS ។
Link: សូមចូលទាញយកឯកសារនៃអង្គសិក្ខាសាលា